Mayor Chiong mireklamo

CEBU, Philippines - Mireklamo si Mayor-Elect Valdimar Chiong sa dakbayan sa Naga nga gidestinohan siya og opisyal sa polis nga moinom.

Ang mayor kagahapon nga gi-interview sa usa ka lokal nga sibyaanan dinhi sa Sugbu nakapangutana pa unsay iyang sala ni Sr. Supt. Erson Digal, ang hepe sa kapolisan sa lalawigan nga gidestino man niini si Sr. Insp. Wilfredo Giducos diha sa Naga Police Station.

Si Giducos maoy kanhi hepe sa Tudela Police Station apan tungod sa mga reklamo nga kanunay lang kining moyarok og ilimnong makahubog, gilabay kini sa Naga.

Si Chiong nagduda hinuon nga may kasuko kaniya si Digal kay niadtong nagsingabot pa ang eleksyon sa Mayo 10 , gipaubos man ang iyang siyudad isip usa sa election hot spot.

Apan sa bahin ni Digal giklaro niini nga wala siyay kasuko ni Mayor Chiong.

Iyang gipasabot nga ang pagbutang niya ni Giducos sa Naga usa na kini ka ordinaryong polis ug walay gihuptan nga posisyon.

Gipasabot hinuon ni Digal nga si Giducos moinom apan dili bayolenting pagka police official. (BANATNEWS)