Nag-withdraw sa ATM gitulis gipusil

CEBU, Philippines - Anaa sa makuyaw nga kahimtang ang usa ka lalaki human gitulis ug gipusil sa tulo ka tulisang nagmotor pasado alas-10 sa miaging gabii sa may A.S. Fortuna St. barangay Banilad.

Si Reyneflor Ugag, 30, taga Sanver Casvil Subdivision, barangay Lahug nakaangkon og samad pinusilan sa nagkadaiyang parte sa iyang lawas.

Ang Mabolo Police Station nakadawat og taho gikan sa gwardiya sa China Bank Banilad branch sa nahisgutang lugar kabahin sa pagpanulis ug may tawong samaron.

Naabtan pang nagkadaugo nila ni SPO4 Rolito Supatan ug kaubanan si Ugag nga gitabang ug dad-onon sa Perpetual Soccour Hospital.

Nasuta nga nag-withdraw ang biktima og kwarta sa automated teller machine sa maong bangko dihang kalit nga miabot ang usa ka motorsiklong may tulo ka lalaking sakay.

Gikatahong kalit gitionan og armas sa mga tulisan ang biktima dayong deklarar og holdup, ang biktima misuway unta og sukol sa mga tulisan apan gipusil kini tulo ka higayon sa kalawasan.

Ang mga tulisan daling mipasirit palayo sa maong lugar sakay sa puting motor nga walay plate number.

Samtang ang hepe sa Theft and Robbery Section Sr. Insp. Bonifacio Garciano mibutyag nga mopahigayon sila karun og joint operation batok sa grupo.

Dugang pa niini mogama usab og cartographic sketch ang ilang buhatan aron ilang masuta kun banggiitan ba ang maong tulisan ug kun anaa ba usab kini sa ilang mga listahan sa mga notadong tulisan sa syudad.   (Lesley Caminade) (BANATNEWS)