Maambong, Blanco: Wa mi motapon ni Villar

CEBU, Philippines - Kusganong gipanghimakak ni 6th district Provincial Board member ug One Cebu Consolacion mayoral candidate Victor Maambong ug Ronda vice mayor Mariano Blanco ang kandidato sa One Cebu Party ug Lakas-Kampi-CMD sa pagkamayor sa lungsod sa Ronda nga mibali na sila ngadto sa kampo ni Sen. Manny Villar sa Nacionalista Party.

Ang duha nagkanayon nga pabilin silang mosuporta kang administration candidate Gilbert ‘Gibo’ Teodoro.

Si Maambong nagkanayon nga wala siya mopirma sa manepistong suportahan si Gob. Gwendolyn Garcia ug tandem niining si Glenn Soco nga si Villar ang giduso pagkapresidente.

Si Maambong nagkanayon nga ang iyang gipirmahan ug gibutangan gyud niya og notes nga nanawagan sa miyembro sa One Cebu paghimo og general meeting alang sa maong isyu. Si Blanco sa iyang bahin nagkanayon nga “blind” siya sa maong manepisto sanglit gidalidali siya sa pagpapirma uban ang pagpasabot nga panawagan kini alang sa pagtawag og tigum sa mga One Cebu Party members.

Iyang gitataw nga ang nagpatawag kaniya uban sa mga mayor sa segundo distrito mi-pickup kaniya sa iyang balay ug gidala siya sa usa ka kan-anan sa Metro Cebu pinaagi sa pagbalhin-balhin og duha ka sakyanan.

Nagdumili si Blanco paghingalan sa mipatawag kaniya apan kining tawhana giingong dili pabor kang Liberal Party presidential candidate Sen. Benigno ‘Noynoy’ Aquino apan miawhag kanilang mo-shift gikan sa green(official color ni Teodoro) ngadto na sa orange (official color ni Villar).

Apan sama ni Maambong wala siya mosugot sa maong sugyot tungod kay nakapasalig na siya kang Teodoro ug lisod na ang pagbali kay dugay na siyang nangampanya kang Gibo.

“Gawas lamang og miingon si Gibo nga 'I am withdrawing my candidacy' anha nata mangita,” pasabot ni Blanco.   (BANATNEWS)