Sunog sa Kalawisan 1 balay ugdaw

CEBU, Philippines - Naugdaw ang usa ka balay sa Zone Casag, barangay Kalawisan, dakbayan sa Lapulapu atol sa nahitabong sunog kagahapon sa alas 9:55 sa buntag nga miresulta sa pagkaangol sa usa sa mga sakop sa pamilyang nagpuyo niini.

Si SFO2 Jumid Alburo, imbestigador sa kabomberohan sa maong dakbayan nga nahinabi sa Banat News mibutyag nga ang balay nga naugdaw gipanag-iya ni Jefthey Doroy. Ang naangol mao si Iven Ezer Doroy, hingkod, nga anak ni Jefthey. Nasugamak sa mga paso sa kayo ug mga samad ang nagkalainlaing bahin sa lawas sa biktima dihang gisuwayan niya og guba ang bintanang bildo sa ilang balay sa tinguha nga maluwas pa unta ang uban nilang mga butang.

Matud pa ni SFO2 Alburo nga napugngan ang kayo sa nagtinabangay nga mga silingan kinsa nag-iyahay sa paggamit sa baldi ug kabo sa tubig, hinungdan nga wala makatapon ang kayo ngadto sa kasikbit nga kabalayan hangtod nga naabtan sa mga bombero.

Si SFO2 Alburo miingon nga ang hinungdan sa maong sunog mao ang depektusong wiring niini. – BANAT NEWS