Patay'ng nadugta na nakit-an

CEBU, Philippines - Usa ka patay’ng lawas nga nadugta na ug gituohang gidakdakan og bato ang nawong ang gidagsa sa bakhawan sa kadagatan sa barangay Bogo lungsod sa Argao niadtong Huwebes sa alas 3:30 sa hapon.

Usa ka mananagat nga si Cesar Albios Lobitos nga residente sa maong dapit maoy nakakaplag sa maong patay’ng lawas samtang kini paingon nang mopalawod sa dagat.

Matud pa ni PO2 Von Tecson sa Argao Police dihang nahinabi sa Banat News wala pa nila mailhi ang pangalan sa maong patay’ng lawas kansang nawong nagusbat na.

Base sa pasiunang pagtan-aw sa lawas daw gidakdakan kini og magahing butang nga gituohang bato, gihulagwawy lang kini nga nagkarsones og kolor itom ingon man seninang kolor itom, taas ang buhok ug tabunon ang pamanit ug dunay daghang tattoo sa kalawasan nga gituohang usa ka lalaki.

Gituohan sa kapulisan nga dili molupyo sa maong lugar ang biktima sanglit wala may nakaila niini. - Darrel Carumba (BANAT NEWS)