Engineer mukiha sa kompanya

CEBU, Philippines - Gipasakaan og kaso sa National Labor Relation Commission kon (NLRC) ang usa ka dakong kompanyang nahimutang sa Ayala Business Park apil na ang duha ka dagkung opisyal niini sa usa ka enhinyerong kawani nga mireklamong ilegal siyang gitaktak sa trabaho.

Si Charlton Inao Sr., costing manager sa maong kompaniya mipasaka og kaso nga illegal preventive suspension ingon man constructive dismissal batok sa langyaw’ng presidente sa gireklamong kompanya, general manager nga usa usab ka langyaw ug ang manager (mga pangalan gipugngan sa Banat News hangtud nga di makuhaan sa ilang habig).

Si Inao girepresentahan sa iyang abogadong si Atty. Salvador Panelo miduso sa maong kaso sa NLRC niadtong Biyernes sa alas 3:00 sa hapon.

Gibutyag ni Panelo dihang nahinabi sa Banat News nga tinguha nilang mabalik sa trabaho ang iyang kliyente ug nangayo og back wages sukad nga kini giingong illegal nga gisuspenso gikan niadtong petsa 22 sa Pebrero ning tuiga.

Matud pa ni Inao nga nagkunsabo ang iyang mga labaw pagbutang og mga alegasyong hinimo-himo batok kaniya aron dauton ug mapalagpot siya sa trabaho. Giingong kapin sa upat ka tuig siyang nagtrabaho sa maong kompaniya.

Sumala pang Inao nga gipasanginlan siyang nasayop sa iyang costing nga miresulta sa pagkaalkanse og 35 mil dolyares sa kompaniya matag tuig nga mosumada og P1.7 milyones ug uban pang pasangil.

Si Inao gipailawom sa usa ka bulang preventive suspension gikan sa petsa 22 sa Pebrero hangtud petsa 22 sa Marso nga sa iyang pagduda taktakon gyud siya sa trabaho.

Dugang pa niya nga sukad gipatuman ang suspensyon gidid-an na siyang makasulod sa compound sa kompaniya ug gidid-ang makig-estorya ni bisan kinsang trabahante sa maong kompaniya.

Matud ni Inao dihay higayon nga mihangyo siyang kuhaon ang iyang mga personal nga butang sa opisina apan giabog siya.

Si Panelo miingon nga modemanda usab sila og P5 milyones nga danyos sa maong kompaniya ug plano usab nilang mopasaka og laing kaso nga grave coercion batok sa manager ug uban pang opisyal.

Gitakda karung petsa 5 sa bulan sa Abril ang preliminary conference sa kaso ubos ni labor arbiter Recardo Barrios Jr. (Darrel Carumba)    (BANATNEWS)