Soc midaot sa media pagdepensa ni Joavan

CEBU, Philippines - Si Mayor Socrates Fernandez sa dakbayan sa Talisay padayong nagdepensa sa iyang anak nga si Joavan, hangtod gigamit ang mga pulong-pulong nga gipahigayon sa mga barangay sa Talisay ning nag-inangat ang eleksiyon.

Si Fernandez nanawagan sa katawhan nga nanambong sa pulong-pulong sa Alayon-Nacionalista Party niadtong Pebrero 17 sa barangay Poblacion nga dili patuhoon sa mga balita nga nanggawas.

Matud sa mayor nga ang mga balita nga nanggawas wala'y tinuod. Ang gipasabot sa mayor mao ang balita nga nanggawas kabahin sa pagpang-haras sa iyang sinagop nga si Joavan nga katapusang kaso mao ang pagpanion sa magtiayon nga nasaghiran sa iyang sakyanan ug giingnan pa nga “Wa ka kahibawo ako ning Talisay.”

Usa sa mga opisyal sa barangay Poblacion kinsa mihangyong dili magpahingalan mibutyag ngadto sa Media in Cebu South (MICS) nga ang mayor naapektohan sa mga nanggawas nga balita kalabot ni Joavan.

Ang MICS, grupo sa mga tigbalita nga nagbase sa dakbayan sa Talisay, ug nagsunod sa matag-adlaw nga ang panghitabo sa siyudad ilabi na sa mga insidente nga gikalambigitan ni Joavan.

Ang nahisgutang opisyal nagkanayon nga si Fernandez misulti ngadto sa mga nanambong nga opisyal ug mga residente nga dili motuo sa mga balita tungod kay dako kining bakak.

Si Marlon Belleta sa DyAB ug presidente sa MICS mihulagway sa pamahayag sa mayor nga usa ka iresponsableng pamahayag isip usa ka mayor.

“He is entitled to his own opinion. Pero hasta siya bakak sab diay nang balita ni Kristo nga iyang gisabwag,” ni Belleta pa.

Apan matud ni Belleta wala siya makadungog sa mga gisulti sa mayor apan matud niya nga dili katuohan nga masulti kini ni Fernandez kinsa gawas nga mayor sa siyudad, usa usab kini ka brodkaster.

Ang mga sakop sa media nga nakadungong sa isyu nagkanayon nga tataw gyud nga si Fernandez mokonsente sa iyang sinagop, karon nga gigamit niya ang pulong-pulong pagdaot sa media aron depensahan si Joavan. – BANAT NEWS