1 napaig, 50 ka balay naugdaw

CEBU, Philippines - Patay ang usa ka 82-anyos nga ginang atol sa pagkasunog sa 50 kapin ka panimalay sa sitio Sea Breeze, sa Pusok dakbayan sa Lapulapu kagahapon sa udto.

 Ang namatay mao si Cerila Payac, 82, residente sa maong dapit nga nagpuyo sa balay sa anak niining si Lito Payac nga diin usab magsugod ang kalayo.

 Nasayran nga si Lito Payac kagahapon sa mga alas 11:00 sa kaudtohon giingong naglung-ag og kan-on ug nigamit og kahoy nga sugnod apan iyaha kining nabiyaan aron magsag-ob og tubig ug nahabilin ang biktima.

Gituohang ang agipo sa sugnod maoy hinugdanan sa kalayo ug sa pagbalik ni Lito mikatap na ang kalayo sa ilang panimalay ug wala usab makagawas ang iyang inahan, gikatahong gisuwayan pa unta niya kini og luwas apan tungod sa kadako sa kalayo wala na niya kini mabuhat.

Matud pa ni Lapulapu City Fire Marshal Chief Insp. Ricardo Cornelio ginama sa light materials ang kabalayang nasunog maong dali kaayong mikuyanap sa palibot ang kalayo, gibasol usab ang kakusog sa hangin niadtong higayuna nga nakapasamot sa sitwasyon.

 Tungod sa kahuot sa mga balay ug nahimutang daplin sa dagat naglisod ang kabumberohan pagsulod sa kabalayan maong gisumpay-sumpay nila ang ilang mga hose aron lang maabot ang sudlonong bahin sa lugar. 

Gibana-banang mokabat ang danyos sa P800 mil samtang padayon   pa ang imbestigasyon.

 Nadawat sa kabomberohan ang sunog mga alas 12:15 kagahapon sa udto diin gipaubos dayon ngadto sa Task Force Alpha apan nakontrolar sulod sa unom ka minutos.

 Samtang si Pusok barangay Kapitan Tranquilino Omolon mipadayag nga anha una ipahimutang ang mga nasunogan sa ilang sports complex ug sa stage duol sa ilang barangay hall.

Aporan usab sila sa dinaliang pagkaon alang sa ilang paniudto uban sa pagpangayo og hinabang ngadto sa kagamhanang lokal sa dakbayan sa Lapulapu.

Samtang sa Talisay, mikabat sa P400 mil ang danyos sa sunog diha sa Canton Ville sa barangay San Isidro sayo sa buntag nga miugdaw sa duha ka balay ug midanyos og laing tulo ka panimalay sa kinse minutos nga sunog kagahapon sa buntag.   (BANATNEWS)