^

Banat Balita

Gipamatay tungod sa bangi sa yuta

- Ni Guam Logroño -

CEBU, Philippines - Patay ang duha ka mag-uuma human pamusila sa managlahing dapit nga ang mga hinungdan gituohang gumikan sa bangi sa yuta, usa kanila gipatay diha gyud mismo sa barangay hall diin ang husay sa iyang kabangi gihimo niadtong Biyernes sa buntag.

Ang biktima sa barangay Cansabusab, Poro, sa Isla sa Camotes giila nga si Modesto Burla, 78, biyudo, residente sa nahisgutang lugar human kini makaangkon og mga samad pinusilan sa dughan ug ubos nga bahin sa tiyan ug wala na makaabot nga buhi sa tambalanan.

Ang suspetsado giilang si Christian Joy Burla, 23, nga paryente ra sa biktima kinsa padayon pang gipangita nga miikyas human pusila ang biktima diha mismo atubangan ni barangay Kapitan Luisa Solano sa barangay hall sa Cansabusab samtang gihusay ang ilang bangi sa yuta.

Matud pang PO1 Patrick Mangubat, duty desk officer sa Puro Police Station sa Banat News nga si Modesto mipasaka’g reklamo batok kang Christian kabahin sa ilang yuta.

Niadtong Biyernes sa alas 11:00 sa buntag gihusay sa kapitan ang duha apan samtang nagpadayon ang husay gikatahong mibarog ang suspek ug migawas sa hearing.

Dangtan pipila ka gutlo mibalik kini ug may dala nang armas dayon walay daghang pangutana kalit nga gipusil ang biktima makadaghang higayon, hinungdan sa pagkakugang sa kapitan ug sa uban pang mga tawong mitambong sa hearing.

Matud pa ni Mangubat walay nahimo ang mga tawo didto pagpugong o bisan na pagsuway og sikop sa suspek gumikan sa kahadlok hinungdan nga nakaikyas kini. Giingong mipabuto pa sa iyang armas ang suspek sa dayon nang gawas sa barangay.

Ang mga tawong diha sa lugar nga nahitaboan mitunol sa mga mirespondeng polis sa duha ka kabhang sa bala sa kalibre .38 nga rebolber giingong nahagbong sa yuta gikan sa armas sa suspek dihang nagkarga kini og bala.

Sa laing bahin, laing mag-uuma ang namatay human pusila sa wala mailhing lalaki samtang naglakaw diha sa libon ug bakilid nga bahin paingon ngadto sa ilang balay niadtong Biyernes sa buntag diha sa sitio Kapawaan, barangay Agbalanga, lungsod sa Moalboal.

Si Diosdado Manilhig, 49, nakaangkon og mga samad pinusilan sa ulo, dughan ug tuong tiil wala nay kinabuhi nga napalgan sa tulo niya ka minor de edad nga mga anak.

Sa imbestigasyon sa mga polis, nakadungog ang tulo ka anak ni Manilhig og upat ka buto hinungdan nagdali sila og panggawas sa ilang balay aron mosusi.

 Ang 13-anyos nga anak sa biktima mibutyag sa mga polis nga nakakita kini og usa ka lalaking nagsul-ob og itom nga purol, itom nga t-shirt ug nagtakuban diin gikan ang buto ug sa kahadlok gipangguroy niya ang iyang duha ka mga manghud balik sa ilang balay.

Apan pila ka minuto ang milabay ang tulo ka bata mibalik ngadto sa lugar nga nahitaboan ug ilang nakita ang ilang amahan nga wala nay kinabuhi ug may mga samad sa kalawasan hinungdan nga nangayo sila og panabang sa ilang kabarangay.

Si Inspector Rolando Evalle, hepe sa Moalboal Police Station mibutyag sa Banat News nga ilang gisusing motibo mao ang kabahin sa bangi sa yuta, giingong nag-ilog sa mga kabanay sa biktima sa yuta kaniadto pa.   (BANATNEWS)

BANAT NEWS BIYERNES CANSABUSAB CHRISTIAN JOY BURLA ILANG KAPITAN LUISA SOLANO MATUD MOALBOAL POLICE STATION
  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with