Taga Call Center way kuyaw sa AIDS

CEBU, Philippines - Giklaro sa Department of Health (DOH) nga dili high risk ang mga call center agent sa posibling matakbuyan sa Human Immunodeficiency Virus-Acquired Immune Deficiency Syndrome (HIV-AIDS).

Kini sukwahi sa usa ka survey nga gipagawas dili pa lang dugay nga nagbutyag nga ang mga call center agent maoy adunay dakong risgo nga matakbuyan sa maong sakit.

Gitataw sa Director for National Epidemiology Center sa DOH, Doctor Eric Tayag, nga ang mga call center aduna hinuoy high risk behavior nga maka-HIV.

Kini tungod usab sa kasagarang batasan niini nga moinom nga makatabon sa huna-huna niini nga mosangpot sa ilang pagkaluya ug mawad-an na og kauwaw.

Kung mawagtang na ang respito sa kaugalingon, miingon si Tayag nga dako ang kahigayonan nga mamahimong yano na lang niini ang pagpakighilawas.

Gipadayag ni Tayag nga ang ilang gihimo nga pagtoon nag-ila ug nagtataw lang sa risgo sa mga call center agent nga angayang matan-aw ug mahatagan og pagtagad. Apan giklaro ni Tayag nga bisan kinsa mahimong magkasakit og HIV-AIDS kung dili magmatngon sa pagpakighilawas.

“So, the message is… it’s not who you are but what you do, if we engage in unsafe sex practices,” sumala ni Tayag.

Nasayran nga niadtong miaging buwan lang sa Disyembre, miabot og 126 ka kaso sa HIV-AIDS ang natala sa tibuok kapupod-an.

Kini giingon ni Tayag nga maoy labing daghang HIV-AIDS cases nga nataho ngadto sa iyang buhatan sulod sa 25 ka tuig.      

Samtang sa kinatibuk-ang tuig sa 2009, mikabat usab og 835 ka kaso sa HIV-AIDS ang napatik sa talaan sa DOH ug 4,424 ka kaso sukad niadtong 1984.

Ang gikabalak-an karon ni Tayag mao ang pagbali sa transmission sa sakit gikan sa heterosexual ngadto na sa pagpakighilawas sa lalaki tali sa laing lalaki. Gipadayag hinoon ni Tayag nga ang DOH mihingusog sa ilang kampanya sa pagsumpo sa nahisgutang makamatay nga sakit. Kini ang hinungdan nga si Tayag gipadala dinhi sa Sugbu ug nakigkita sa mga opisyal sa siyudad kagahapong adlawa. – BANAT NEWS