Ombudsman Gutierrez mitudlo'g tigpamaba sa Visayas

CEBU, Philippines - Tungod sa padayong pagsaway ug pagkondena sa mga sakop sa media ug ubang sector dinhi sa Sugbu batok na sa gag order ni Deputy Ombudsman for the Visayas Pelagio Apostol, si Ombudsman Ma. Merceditas Gutierrez mitudlo og duha ka opisyal nga tigpamaba.

 Si Gutierrez mipagawas usa ka pahina nga Office Order number 205 series of 2009 nga nagtudlo og duha ka mga tigpamaba sa Visayas ug sa Mindanao aron makatubag dayon sa bisan unsang mga pangutana og kasayuran nga buot pakisayran sa mga sakop sa media. Si Gutierrez mitudlo kang Assistant Ombudsman, Atty. Virginia Palanca Santiago isip maoy official spokesperson sa Office of the Deputy Ombudsman for the Visayas samtang si Assistant Ombudsman, Atty. Rodolfo Elman maoy tigpamaba sa Office of the Deputy Ombudsman for Mindanao.

 Samtang gipahibawo usab ni Gutierrez ang mga tigpamaba sa Central Office nga mahimong ma-interview usab labot sa mga kaso nga tua na sa Manila Office.

 Kini naglangkob nila ni Assistant Ombudsman Mark Jalandoni alang sa fact-finding investigation, matters and finish cases, Assistant Ombudsman Jose de Jesus Jr. alang sa cases under preliminary investigation ug administrative adjudication and policy matter ug si Assistant Ombudsman Evelyn Baliton alang sa corruption prevention ug public assistance cases.

 Ang maong kamandoan ni Gutierrez maoy nagpabaliwala sa gag order ni Apostol kinsa nimando sa iyang mga opisyales ug kawani nga dili magpa-interview sa mga sakop sa media ilabina kun labot sa gipasangil nga overpriced nga katukuran sa CICC ug ubang kontrobersiyal nga kaso. Apan dihang gisulayan sa pagtawag si Santiago kagahapong adlawa nagdumili una kini sa pagpa-interview tungod kay may gitambungan nga conference uban ang mga kaubang mga opisyal sa Ombudsman.   – BANAT NEWS