Aviation Expo '09 bukas sa publiko

CEBU, Philippines - Pormal nga gilusad ang tulo ka adlaw nga Aviation Expo 2009 sa Mactan Cebu International Airport Authority (MCIAA) kagahapon sa buntag. Ang kalihukan gitambongan ni DOTC Sec. Leandro Mendoza ug CAAP Director General Ruben Ciron ug Gobernador Gwendolyn Garcia.

Matud pa ni MCIAA CEO ug General Manager Danilo Francia nga ang maong kalihukan unang higayon nga gihimo dinhi sa Sugbo. Kini gitumong aron mahibalo ang katawhan nga ania dinhi sa Sugbo ang mga abyon nga mahimo nilang matun-an pagpalupad pinaagi sa mga nagkadaiyang mga pribadong Aeronautical Schools.

Ang bugtong tunghaan sa gobyerno nga nagtanyag og kursong aeronautical mao ang Philippine State College of Aeronautics (PHILSCA) nga adunay lima ka mga sangang tunghaan dinhi sa nasud.

Gipakita usab sa maong Expo ang nagkadaiyang abyon sa Philippine Air Force (PAF) nga maoy gigamit sa pakigkombate sa mga rebelde dinhi sa nasud.

Gipakita ni PAF 2nd Air Division Commander Maj. Gen. Nathaniel Legaspi ang ilang mga abyon iggugubat sama SF-260 Turbo Prop (Warrior II), MD 520 MG (Defender) chopper, UH1N1 Huey helicopter, C-130, Nomad plane ug ang mga kagamitan sa Search and Rescue team sa 505th PAF nga nagbase sa Mactan Benito Ebuen Air Base (MBEAB).

Ang kalihukan gihangop nila ni Mendoza ug Ciron nga matud nila anaa kita karong panahona sa aviation era ug kinahanglan masayod ang katawhan sa mga kagamitan ug importansiya sa mga abyon -- pribado ug militar.

Ang maong kalihukan usab gitumong sa ika-19 nga anibersaryo sa MCIA.

Gipasalamatan usab ni Francia ang mga tag-iya sa mga pribadong abyon nga misuporta usab sa maong kalihukan sama sa Aviator pinaagi ni Capt. Joseph Bajenting, Indiana Aerospace University ni Dr. Juvy Toring, Cheynair Aviation ni Cessna Zosa Sarmiento ug ang PHILSCA - MBEAB pinaagi sa ilang Campus Director nga si Dr. Nonadel Alvarado Soriano pinaagi sa pagpakita sa ilang mga abyon atol sa maong expo.

Ang maong Expo molungtad hangtod karong Domingo, Disyembre 20 ug libre nga makita sa publiko ang exhibit nga anaa mahimutang duol sa MIP sa MCIAA. - Bong Soriano (BANAT NEWS)