Manag-amahan napunggit sa sakyanan

CEBU, Philippines - Naangol ang 35- anyos nga lalaki ingon man ang 3-anyos nga anak niini human sila madasmagi og sakyanang nawad-an og preno samtang naglakaw sa barangay Azucena lungsod sa Barili niadtong Biyernes sa alas 6:45 sa buntag.

Ang mga naangol mao sila si Rogelio Manigos, 35, molupyo sa nahisgutang lugar ingon man ang anak niining si Noel Manigos. Samtang ang drayber sa Sportivo Izusu Wagon dunay plaka nga YFY-946 mao si Byone Pada Manolito, 35, taga barangay San Isidro siyudad sa Talisay.

Subay sa imbestigasyon ni SPO4 Edward Villaester sa Barili Police, ang maong sakyanan gikan sa siyudad sa Talisay paingon sa lungsod sa Dumanjug apan pag-abot sa nahisgutang lugar nakasinati kini og mechanical trouble hinungdan nga nawad-an na sa kontrol ang drayber.

Matud sa mga nakasaksi nga kalit lang nisimang sa pikas linya sa karsada ang maong sakyanan ug naatol nga maoy pag-agi sa manag-amahan ug nadasmagan.

Ang mga biktima nakaangkon og mga pangos ug samad sa kalawasan ug gidali pagdala sa Barili District Hospital apan gibalhin sa tambalanan dinhi sa dakbayan sa Sugbo alang sa dugang medikasyon.

Samtang ang drayber sa maong nakadasmag nga sakyanan boluntaryo sab dayung mitahan sa iyang kaugalingon ug nagtingkagol na karon sa detention cell sa kapulisan samtang nagpaabot sa tukmang sumbong nga ipasaka batuk niya.    (BANATNEWS)