Cabuenas maoy ihulip kang Conceal

CEBU, Philippines - Ang bise presidente sa Association of Barangay Captain (ABC) sa dakbayan sa Talisay nga si Celiapo Cabuenas giawhag sa grupo sa administrasyon nga maoy mohulip kang Kapitan Josefina Conceal sa barangay Candulawan kung ugaling moatras gyud kini sa iyang kandidatura isip konsehal sa dakbayan sa Talisay.

Si Cabuenas kinsa kapitan sa barangay Lagtang nga nahinabi sa Banat News kagahapon mibutyag nga niadtong Nobiyembre 26, 2009 gitanyagan siya ni Kongresista Eduardo Gullas nga modagan isip konsehal sa siyudad apan iyaha kining gibalibaran.

Si Cabuenas misuporta ni kanhi Bise Mayor Aberdovey Belleza kinsa mokandidato isip bise mayor sa siyudad ubos sa Liberal Party (LP), miklaro hinuon siyang bisan og mi-endorsar siya kang Belleza apan ubos gihapon siya sa landong sa administrasyon.

Gibutyag niini nga sa milabay’ng adlaw gipatawag siya sa grupo sa administrasyon sa buhatan ni Bise Mayor Lani Abarquez ug giawhag nga maoy pahulipon kang Conceal kung ugaling ang naulahi moatras gyud sa iyang kandidatura tungod sa kakulian sa panglawas. (Brenda Batuto)   (BANATNEWS)