PGMA mi-file na og COC; Gibo, Jamby, Gordon mi-file na usab

CEBU, Philippines - Bisan paman sa mga pagsaway gihinayon ni Presidente Gloria Arroyo kagahapon ang pagsang-at sa iyang certificate of candidacy aron mokandidato pagka-kongresista sa ikaduhang distrito sa Pampanga.

Una pa mi-file sa iyang COC, si Arroyo mitambong og Santos nga Misa sa St. Augustine Church sa iyang natawhang lungsod sa Lubao, Pampanga kuyog si First Gentleman Jose Miguel ug gatusang suporter.

Sa sayo pa si Arroyo namahayag nga iyang tumanon ang kabubut-on sa iyang mga suporter sa Pampanga.

Sa usa ka radio interview, gilikayan ni Arroyo pagtubag ang pangutanang gusto ba niining mausab ang Constitution ug mamahimong prime minister sa nasud sama sa gibuhat ni Vladimir Putin sa Russia.

“That situation is so hypothetical I won't even bother to speculate about it,” mao ray tubag niini. Kun kinabag-an sa mga kandidato sa Lakas-Kampi-CMD coalition makadaog sa duha ka balay balauranan (Ubos Balay Balauranan ug Senado) karong eleksyon sa Mayo dako ang puruhang di masangit ang mga planong pag-usab sa Konstitusyon.

Ang mga kritiko sa pangulo nagdudang nag-apas lang kini nga makalikay sa mga kaso unyang graft nga giplanuhang ipasaka batok kaniya sa iyang mga karibal sa politika inig kawagtang sa iyang immunity sa mga kiha kun wala na kini sa Malacañang, butang usab nga gihimakak sa presidente.

Misang-at na usab kagahapon sa ilang COCs sila si Lakas-Kampi-CMD Gilbert “Gibo” Teodoro ug Edu “Doods” Manzano.

Si Broadcaster Rey Langit ug Pangasinan Mayor Ramon Guico misang-at usab sa ilang COCs pagka-senador sa eleksyon uban ni Gibo.

Samtang misang-at na og COC sila si Senador Richard "Dick" Gordon ug kanhi Metro Manila Development Authority (MMDA) chairman Bayani Fernando ilawom sa bag-ong partidong ilang gitukod nga mao ang Bagumbayan for a New Philippines Party ug mihingalan sa ilang mga kaugalingon nga mga “transformers” tungod sa mga kausabang ilang nahimo sa Subic Bay ug Marikina City.

Bisan walay runningmate, senate slate misang-at usab sa iyang COC pagkakandidato sa pagkapangulo si Senator Maria Ana Consuelo “Jamby” Madrigal kagahapon tungod sa diktar sa konsensya, si Madrigal ikaduhang mokandidatong walay bise-presidente ug senatorial candidates sunod sa environmental activist nga si Nicanor Perlas.  – BANAT NEWS