Cash gift sa Capitol madawat na

CEBU, Philippines - Ang tanang mga kawani sa Kapitolyo hingpit nang makadawat sa ilang 13th month pay ug ingon man P 5 mil nga cash gift.

 Ang buhatan ni Provincial Human Resource Officer Noli Valencia maoy mibutyag niini sa Banat News kinsa miingon nga niadto pang Martes na-release ang laing 2nd half nga cash gift.

 Nasayran nga ang unang katunga sa 13th month ug sa cash gift sa mga empleyado unang gipagawas sa provincial government niadtong bulan sa Mayo niining tuiga.

 Gawas niini, ang mga kawani sa Kapitolyo nagpaabot usab nga mahatagan sa kagamhanan sa probinsya sa Sugbu og extra Christmas bunos.

 Si Valencia nagkanayon nga niadtong miaging tuig, P12 mil ang gipanghatag nga Christmas bunos ngadto sa empleyadong nagdawat og dili mominus P12 mil nga suweldo matag buwan.

 Samtang karong tuiga, ang extra bunos sa Pasko sa mga kawani sa Kapitolyo ibase ni Governor Garcia sa performance sa matag empleyado sa matag departamento.

Kini nagpasabot nga mag-agad ang tanan sa disisyon sa gobernadora kun pilay ihatag nga bunos ngadto sa mga kawani.

 Hinuon unya na kini hisayri kun may extra bunos ba o wala atol unya sa Christmas party sa mga kawani sa Kapitolyo.  - BANAT NEWS