NBI nangayo'g exemption sa gun ban

CEBU, Philippines - Nangayo na og gun ban exemption ang National Bureau of Investigation (NBI)-7 ngadto sa ulohang buhatan sa Commission on Election (COMELEC) subay sa nagkadauol na ang piniliay sunod tuig.

Kini maoy gipahibawo kagahapon ni NBI-7 regional director Atty. Medardo de Lemos, namahayag nga sama sa naandan ipatuman gyud sa Comelec ang total national gun ban inig human sa filing of certificates of candidacy nga sugdan karung Biyernes ug matapos karung petsa 30 niining bulana.

Miingon si de Lemos ila na karung gilihok sa Comelec-Manila ang mga kinahanglanon sa exemptions sa gun ban aron mahuman usab og sayo ug maisyohan ang ilang mga agents og exemption tungod kay kinahanglan kaayo nga magdala gyud og armas ang iyang mga sakop ilabina kay dili matagna ang mga panghitabo subay sa ilang trabaho.

“Amo nang gitrabaho ang exemption didto sa Comelec-Manila aron makadala-dala tanan og armas ang among mga agent panahon sa kampanya kay basin og maulahi ta..kani trabaho sa among agent anaa sa peligro kanunay busa mas maayo masayo ang pag-release sa exemption,” matud ni de Lemos.

Samtang giklaro usab ni de Lemos nga dili gyud sila makahatag og escort niadtong mga VIP’s kon Very Important Persons ug close-in body guards karong nagsingabot na ang piniliay.

Nasayran dunay ubang mga kandidato mosuway sa pagpangayo og escort ilabina panahon sa kampanya, apan giklaro ni de Lemos nga wala siya’y ikahatag ni bisan kinsang politiko nga mohangyo kaniya tungod kay kuwang ang iyang mga sakop. - Rey Pasaporte (BANAT NEWS)