Maambong 'Out' na sa One Cebu Party

CEBU, Philippines - Human kang Bise Gobernador Gregorio Sanchez, si Provincial Board member Victor Maambong na usab ang gihugon-hugunang mobiya sa One Cebu Party ni Gobernador Gwendolyn Garcia kun siya dili makauyon sa proseso sa pagpili sa kandidato sa pagkakongresista sa siksto distrito nga mao karon ang giplanohan ni Maambong nga daganan sa umaabot nga eleksyon.

Matud pa ni Maambong nga andam siyang mosubay sa proseso sa partido ni Garcia sa pagpili sa kandiato sa pagkakongresista sa naasoy'ng distrito.

Apan kun dili siya maoy mapilian ug dili niya mauyunan ang paagi sa pagpili andam siyang motapon sa laing partido aron lamang makadagan sa pagkakongresista.

Giklaro hinuon ni Maambong nga sa higayon nga mobiya siya sa partido sa gobernadora mananghid siya og tarong sa gobernadora uban ang pasalig nga iya gihapon suportahan ang kandidatora ni Garcia sa pagka-gobernador.

Si Maambong lig-on kaayo ang iyang mahimong kaatbang nga pilianan kay naglangkob man kini sa kanhi mayor sa Mandaue nga si Mayor Thadeo Ouano, Glenn Socco nga nahimong suod kaayo sa gobernadora ug si Bise Mayor Carlo Fortuna sa Mandaue.

Sigon pa ni Maambong nga mahimong moadto siya sa Nationalista Party kay nagkalig-on ang partido ni Senador Manny Villar o ba kaha sa Liberal Party ni Senador Benigno ‘Noynoy’ Aquino III.

 Ang One Cebu Party nga gipangulohan ni Garcia gikatakdang mupahigayong og general assembly karong semanaha aron makapili og kompletong lineup sa mga lokal nga kandidato sa tanang mga distrito sa probinsiya sa Sugbu. – BANAT NEWS