Mipatay sa humabdos gipatay sab

CEBU, Philippines - Namatay usab ang usa ka ama-ama kinsa miluba patay sa iyang 29 anyos nga ulitawong humabdos didto sa Purok Caimito, barangay Sangi siyudad sa Toledo niadtong Martes sa alas 6:00 sa gabii.

Ang ama-amang namatay mao si Rene Libores , hingkod , samtang ang humabdos niya mao si Ronald Cañada Tagadan, 29, nga pulos taga Purok Caimito.

Si PO3 Julius Sanchez sa Toledo City Police Station mibutyag sa Banat News nga sa sayo pa nagkalalis ang duha sa personal nga butang nga misangko sa pagpanunggab sa ama-ama ngadto sa iyang humabdos.

Maayong pagkaigo sa naulahi sa iyang liog ug ibabaw nga bahin sa walang kilay ug nabugtoan kini sa kinabuhi pag-abot na didto sa Toledo City District Hospital.

Samtang ang ama-ama human makaluba sa iyang humabdos dali kaayong misibat nga nagbitbit sa kutsilyong giluba niya sa iyang humabdos, ug paglabay sa duha ka oras nakit-an nalang kini nga nagbuy-od nga wala nay kinabuhi sa barangay road sa Sitio Tisa, barangay Sangi, sa maong dakbayan. Sumala sa kapolisan nga nakaangkon kini og samad dinunggaban sa iyang tiyan ug bukobuko nga maoy hinungdan sa iyang kamatayon. Nakapunit ang kapolisan og duha ka parisan sa gunting ug usa ka kutsilyo tupad sa patay’ng lawas ni Libores nga maoy gituohang gigamit sa nagpatay kaniya. Gipangita pa karon sa kapolisan ang mipatay kang Libores. – BANAT NEWS