Comelec nabalaka sa kadasok sa nagparehistro

CEBU, Philippines - Samtang nagkaduol na ang deadline sa rehistrasyon sa mga botante, misamot ang kabalaka sa mga tinugyanan sa Commission on Elections (COMELEC) tungod sa pagsiaw sa mga katawhan sa paghugop aron magparehistro sama sa nahitabo sa taga dakbayan sa Lapulapu.

Si Cebu provincial election supervisor Lionel Marco Castillano miangkon kagahapon nga nabug-atan siya sa problema bahin sa katawhang nagdasok sa pagparehistro sa dakbayan sa Lapulapu.

Matud ni Castillano nga mipadala na siya og duha ka kawani didto sa ilang buhatan sa Comelec Lapulapu aron moabag sa election officer didto sa pagdawat sa mga nagparehistro nga mga bag-o ug karaang mga botante sa maong lugar.

Gani siya miingon nga matag adlaw makaparehistro sila og 300 ngadto sa 400 ka mga bag-ong botante diha sa maong dakbayan.

Samtang sa iyang bahin gidasig usab ni Cebu City North district election officer Marchel Sarno ang mga batan-on nga mahimo nang makabotar sa 2010 eleksyon nga magparehistro na og dili magpaabot sa deadline karong Oktubre 31 nga mao ang katapusang adlaw sa pagpangrehistro.

Matud ni Sarno nga hangtod karong Sabado nalang sa alas 12:00 sa tungang gabii ang gitugot sa pagdawat og mga magparehistro.

Nunot niini giawhag ni Sarno kadtong wala pa makaparehistro nga mag 18 anyos atol sa adlaw sa piniliay sa pagparehistro na sa buhatan sa Comelec, kini aron dili mosamot ang paghuot sa tawo atol sa deadline karong Sabado.

Sa pagkakaron gilugwayan sa Comelec gikan sa alas 8:00 sa buntag hangtod na sa alas 9:00 sa gabii ang rehistrasyon sa mga bag-ong mga botante.

Giawhag sa Comelec ang mga kompaniya sa kuryente nga paningkamotan nga walay mahitabong brownout niining semanaha hangtud sa alas 12:00 sa tungang gabii sa Sabado aron dili mabalda ang rehistrasyon. - Rey Pasaporte (BANAT NEWS)