Nerez: Polis sa Consolacion magpabilin

CEBU, Philippines - Gipaluyohan sa pangulo sa kapulisan sa rehiyon 7 nga si Chief Supt. Lani-O Nerez, ang disisyon ni Sr. Supt. Jesus Gaquing, pangulo sa Cebu Provincial Police Office (CPPO) sa pagtangtang sa duha ka police escort ni Mayor Avelino Gungob sa Consolacion nga maoy gikasuk-an sa mayor.

Kini maoy gipadayag ni Nerez kagahapon sa mga tigbalita isip re-aksyon sa lakang ni Mayor Gungob nga hulipan og mga tanod ang police sa ilang lungsod.

Matud pa ni Nerez nga siya maoy naghatag og go-signal ni Sr. Supt. Gaquing, dihang gipahibalo siya niini sa kasong gi-atubang sa duha ka police escort sa mayor nga sila si PO3 Sherwin Leyson ug PO3 Joeramie Espinosa.

Matud pa ni Nerez nga gawas sa mga kasong giatubang sa duha ka police escort sa mayor, gikinahanglang aduna sila’y sundong proseso sa paghatag og mga police escort ngadto sa usa ka public official nga dili kuhaon gikan sa usa ka police Station.

Gipasabot niya nga kadtong mga opisyal nga mangayo og   escort moagi pa kini sa Police Security and Protections Office (PSPO) kinsa maoy motuon kun unsa kabug-at ang hulga sa kinabuhi nga giatubang sa usa ka opisyal.

Subay niini giklaro ni Nerez nga magpabilin gyud ang mga police sa nahisgutang lungsod ug dili kini i-pull-out sukwahi sa tinguha sa mayor.

Sumala pa niya nga mandato sa kapulisan ang pagsilbi ug pagpanalipod sa katawhan sa matag lungsod ug kun adunay mahitabo sa maong lugar tulobagon kini sa kapulisan.

Kahinumdoman nga mibahad si Mayor Gungob nga iyang palayason ang mga pulis sa iyang lungsod   ug kun dili kini mamahawa iyang putlan sa supply sa kuryente, tubig ug telepono. – BANAT NEWS