Driver gipusil sa kawatan

CEBU, Philippines - Mi-ungot ang bala sa tuong aping sa usa ka PUJ driver nga gipusil sa usa ka kawatan didto sa Purok Caimito, Brgy. Gun-ob dakbayan sa Lapulapu sa milabay’ng gabii.

 Ang biktima mao si Alejandro Godinez, 56, minyo, nga taga Purok Caimito, ug usa ka PUJ Multicab driver.

 Matud pa ni PO3 Candido Barinque sa Crime Against Persons (Homicide) nga ang biktima gikan pa sa pagpamasahero ug human mograhe sa iyang sakyanan sa kilid sa ilang balay namatikdan niya nga adunay kawatan nga misulod sa iyang multicab.

 Unya gitangtang niini ang CDI sa iyang sakyanan hinungdan nga iya kining gisita.

 Apan imbis modagan, gipusil na hinuon siya sa tuong aping ug miungot pa gyud ang bala niini.

 Gihatod dayon sa Vicente Sotto Memorial Medical Center sa dakbayan sa Sugbo ang biktima samtang, padayon pang gipangita sa kapolisan ang kriminal. - Bong Soriano (BANAT NEWS)