Kapitolyo gisaway sa militante

CEBU, Philippines -  Mga militanteng grupo sa Bayan ug Kadamay mipahigayon og rally protesta atubangan sa Kapitolyo pasado alas 8:00 ang takna kagahapon sa buntag batok sa gihulagway nilang “eskandalosong pagpalit sa Kapitolyo sa lote sa lungsod sa Naga” nga nalubog sa tubig dagat ug kabakhawan.

Sigon sa report nga ang nangulo sa maong grupo mao si Socrates Luta pangulo sa grupong Kadamay.

Ang maong grupo kusganong mikondena sa pagpalit sa kagamhanan sa probinsiya sa maong luna tungod kay daghang mga anomaliya.

Ilang gipanawagan nga ipadali ang imbestigasyon sa Ombudsman aron masilotan dayon sila ni Governor Gwendolyn Garcia ug Bokal Juan Bolo nga maoy nag-unang opisyal sa Kapitolyo nga klarong nalambigit sa kontrobersiya.

Gihulagway niini nga walay padulngan ang imbestigasyon sa panel of investigators nga giumol ni Garcia na mismo ug sa mga sakop sa Hunta probinsiyal tungod kay pulos man kini kaalyado sa gobernadora.

Wala hinuon magdugay sa ilang rally ang maong grupo sa mga militante tungod kay gibugaw ra usab kini sa mga security guard nga nakadestino sa atubangan sa Kapitolyo. - Chester Abadilla (BANAT NEWS)