15th Anniversary sa Banat News gi-buenas

CEBU, Philippines - Wala pa gihapon mabuntog ang Banat News pagkuha sa duha sa labing importanteng pasidungog nga gihatag sa Cebu Archdiocesan Mass Media Awards 2009 niadtong milabay'ng Domingo, kini naatol usab sa ika-15 nga kasumaran sa Banat News.

Ang Banat News maoy napilian sa mga academe jurors sa nagkadaiyang dagkong unibersidad dinhi sa Sugbu sa Best in News Writing gikan sa mga balitang sinuwat ni Elly Bolonos.

Samtang ang Banat News gihapon maoy midawat sa pasidungog nga Special Citation for Special Reports Writing gikan sa mga sinuwat ni Edwin Ian Melecio.

Ang duha ka mga pasidungog nga nakuha sa Banat News maoy giisip nga labing dagkong pasidungog alang sa tabloid category sanglit balita man ang nag-unang produkto niini.

Niadtong 2007, ang Banat News unang misalmot sa CAMMA ug mihakot sa Best in News Writing, Best in Investigative and Special Reports Writing ug Best in Editorial Cartooning.

Ning tuiga, lakip sa na-nominate si Judelyn Saavedra alang sa Editorial Cartooning Category.

Samtang ang The Freeman nga igsuong pamantalaan sa Banat News nakakuha usab sa Best in Feature Writing ni Archie Modequillo ug Best in Column Writing ni Father Roy Cimagala.

Ang mitunol sa maong awards mao sila si Arsobispo Ricardo Cardinal Vidal, Press Secretary Cerge Remonde ug Rdo. Padre Trinidad Silva nga maoy tsirman sa Commission on Mass Media sa Artsidiyosesis sa Sugbu.

Ang awarding gihimo diha sa Cebu Grand Convention Center nga gitambungan sa nagkadaiyang mga media outfits sa Sugbu.

Kagahapon sa alas 3 sa hapon, gisaulog ang Thanksgiving Mass sa ika-15 nga kasumaran sa Banat News sa writer sa Banat News nga si Rdo. Padre Reynaldo Cui nga nadestino sa parokya sa Sibonga ug ni Rdo. Padre Dave Villaceran nga nadestino sa Cebu Metropolitan Cathedral. Ang Santos nga Misa gihimo sa editorial office sa Philstar Building. (Wen Celen) (BANAT NEWS)