Midagmal sa ilang anak magtiayon gipadakop

CEBU, Philippines - Nagtingkagol sa Talisay City detention cell ang magtiayon human sila gisumbong sa ilang paryente ngadto sa opisyal sa barangay tungod sa pagpamun-og sa ilang 3-anyos nga anak nga lalaki niadtong Huwebes sa hapon diha sa usa sa mga lugar sa barangay Bulacao, dakbayan sa Talisay.

Si Kapitan Raul Cabañero ang daling mihimo og aksyon sa maong hitabo ug nakig-ayuda kini sa city social welfare ug kapolisan sa siyudad.

Uban sa city social welfare nga si Fe Bacaltos ug kang SPO1 Ricardo Balbutin sa Talisay City Police Station gisikop ang ginikanan sa nahisgutang bata ug temporaryo kining gi-detener sa Talisay City detention cell.

Base sa taho nga ang nahisgutang bata ang gibun-og sa iyang mga ginikanan hinungdan nga wala na makaagwanta ang mga paryente tungod sa kaluoy sa bata misumbong sila ngadto sa ilang kapitan.

Si SPO1 Margienette Yosores sa Talisay City Police Station Women and Children’s Protection Desk sa pakighinabi niini sa Banat News kagahapon nagkanayon nga gihuwat niyang motungha diha sa iyang buhatan si Cabañero aron moduso og pormal nga reklamo batok sa nahisgutang mga ginikanan sa bata.

Matud niini nga wala pa siya makapahigayon og pormal nga imbestigasyon sa maong insidente tungod kay wala pa may mga reklamanteng mitungha diha sa iyang buhatan. Ang bata karon gipaubos na sa kustodiya sa city social welfare. (Brenda Batuto)    (BANAT NEWS)