Bala miungot sa baba

CEBU, Philippines - Miungot sa baba sa usa ka batan-ong lalaki ang bala sa armas sa tawong mipusil kaniya sulod sa diskohan sa barangay Cogon Cross sa dakbayan sa Danao alas 11 pasado ang takna sa miaging gabii.

Ang biktima mao si Ronald Pinas, 23, taga sitio Ylaya sa maong barangay, gitumbok nga mipusil kaniya mao si Andreo Olivirio,  taga barangay Tuburan Sur sa mao gihapong dakbayan.

Si SPO4 Teofilo Deguilmo   sa Danao Police Station nga nahinabi sa Banat News nagkanayon duna nay mainitong panaglalis ang duha sa milabay'ng mga adlaw ug dihang nag-abot sa diskohan niadtong milabay'ng gabii kalit gipusil og .38 rebolber sa suspetsado ang biktima.

Ang mga kauban ni Pinas mao nay midala sa naulahi sa tambalanan samtang daling miikyas ang suspek. Ang biktima sumala pang Deguilmo naigo sa baba ug nag-ungot pa ang punglo sa ilawom ug gikinahanglang dad-on sa tambalanan sa Sugbu aron operahan. -  BANAT NEWS