Jagmoc di moritero sa politika

CEBU, Philippines - Gipanghimakak ni Cebu City Councilor Edwin Jagmoc ang taho nga moretiro na siya sa politika human malambigit og kontrobersiya.

Matud pa sa konsehal nga samtang may pagsalig pa kaniya si Mayor Tomas Osmeña, siya magpapili pa gihapon sa sunod tuig nga eleksyon.

Ang konsehal nga anaa pa sa iyang ikaduhang termino determinadong magpasubli sa katungdanan ug padayong moalagad sa mga Sugbuanon.

Nahimong kontrobersyal si Jagmoc human usab ilambigit sa usa ka dalagang sakop sa Mayor’s Management Team (MMT) sa City Hall.

Gipanghimakak hinuon kini sa konsehal ug ni Misty Majistrado nga duna sila'y relasyon ug ang ilang kasuod sa usa'g-usa giingong gihatagan lang og malisya sa uban.

Butang nga gidasunan usab sa asawa ni Jagmoc nga si Gina uban sa pagpadayag nga buotan ug responsableng pagkatawo ang iyang bana.

Gikonsiderar na sa konsehal ang iyang giagian nga kontrobersiya nga kabahin sa iyang panerbisyo ug kini giingong wala makaapekto sa iyang trabaho.

Gani miingon si Jagmoc nga gawas sa Solid Waste ug Composting nga gitambayayongan nilang Majistrado pagsabwag sa mga Sugbuanon, duna siya'y laing giatiman nga trabaho sama sa pagpahipos sa mga basura. – BANAT NEWS