Natagak sa jeepney namatay

CEBU, Philippines – Patay ang usa ka 18-anyos nga dalaga human kini giingong matagak sa jeep nga pasaheroan nga iyang gisakyan niadtong Biyernes sa gabii diha sa tulay sa Mananga, barangay Tabunok, dakbayan sa Talisay.

Ang biktima mao si Carren Cabrera, lumad nga taga barangay Tubod, lungsod sa Sibonga apan temporaryong nagpuyo diha sa Fairview Village, barangay Lawaan II.

Gikatahong miliki ang ulo ni Cabrera ug daling gidala ngadto sa Minglanilla District Hospital ni Sergio Fernandez, 28, taga barangay Lagang, lungsod sa Carcar drayber sa PUJ nga gisakyan sa biktima.

Ang maong jeepney nasuta nga magbiyahian sa rotang Banawa-Carbon apan ang garahian niini sa lungsod sa Minglanilla ug niadtong tungura padulong na kining mogarahe.

Apan tungod sa kahimtang ni Cabrera gibalhin kini ngadto sa Vicente Sotto Memorial Medical Center apan kagahapon sa alas 3:00 sa kaadlawon nakabsan sa kinabuhi ang biktima sa nahisgutang tambalanan.

Si SPO4 Henry Obiso hepe sa traffic division sa Talisay sa pakighinabi niini sa Banat News kagahapon nagkanayon nga gituohang milayat si Cabrera gikan sa jeep sa wala pa matinong hinungdan.

Gituohang naugbok ang ulo sa biktima diha sa aspaltadong karsada sa tulay nga maoy hinungdan sa pagkaliki niini nga miresulta sa iyang kamatayon.

Niadtong higayona si Cabrera gisugo og tambal sa iyang inahan diha sa Tabunok samtang si Fernandez ang nagbiyahe gikan sa dakbayan sa Sugbo paingon na mogarahe.

Matud pa ni Obiso nga base sa ilang imbestigasyon, si Fernandez nag-aginod sa pagpadagan sa iyang gimanehong jeepney tungod sa traffic ug pag-abot niini diha dapit sa Saint Joseph Parish kalit lang misakay si Cabrera bisan og nagdagan na ang sakyanan.

Si Cabrera gisita sa drayber kung asa kini paingon ug giingong mitubag kini nga anha lang siya sa eskina sa Fairview Village manaog ug mipaduol sa drayber dayon tunol sa plete.

Apan gumikan kay mogarahe naman siya wala dawata ni Fernandez ang plete sa dalaga tungod kay duol lang ang kanaogan niini ug niadtong tungora paingon na siyang mogarahe.

Apan paglingi og usab ni Fernandez nahibulong na kini tungod kay nawagtang na si Cabrera diha sa likod sa jeepney ug usa ka drayber sa traysikol nga nagsunod kaniya na maoy mipahibawo nga ang iyang pasahero nahagbong diha sa karsada.

Daling gipaatras ni Fernandez ang sakyanan ug gipunit gikan sa karsada si Cabrera ug gidala ngadto sa Minglanilla District Hospital.

Si Obiso midugang nga temporaryo una nilang gibalhog si Fernandez tungod kay padayon pa sila sa ilang imbestigasyon sa hitabo ug ipaubos sa autopsy ang patay’ng lawas sa biktima. – BANAT NEWS