Mga hepe pakigtagboan sa acting mayor

CEBU, Philippines – Pakigtagboan ni acting Mayor Michael Rama ang hepe sa kapulisan sa dakbayan karong adlawa uban sa mga station commander sa siyudad tungod sa mga pagpanulis nga nahitabo sa dakbayan sa Mandaue ug Talisay ning miaging mga adlaw nga nikalas og mga kinabuhi lakip na ang mga pagpamombang nahitabo sa Mindanao.

Dili buot ang acting mayor nga mahitabo ang susamang insidente dinhi sa siyudad hinungdan nga iyang pakigkitaan ang kapulisan.

Kini aron sutaon ang gihimo niining mga lakang alang sa pagpatunhay sa kahusay ug kalinaw sa dakbayan taliwa sa sunod-sunod nga mga panghitabo.

“The fact that it’s happening, it’s advisable to have an early discussion with the police…hoping and praying nga a similar incidents will be prevented,” sumala ni Rama.

Lakip sa pakigtagboan sa acting mayor mao ang mga negosyante sa dakbayan partikular na ang mga sakop sa Cebu Chamber of Commerce and Industry (CCCI).

Labaw sa tanan, makigtigom usab si Rama sa kadagkuan sa Muslim Community sa Sugbu alang gihapon sa pagpalig-on sa seguridad sa siyudad.

Kini taliwa sa mga pagpamomba nga nahitabo sa upat ka mga dapit didto sa Mindanao sulod lang niining semanaha nga nitay-og sa maong rehiyon.

Unang nabiktima sa pagpamomba niadtong Domingo mao ang siyudad sa Cotabato diin labing minos lima ang namatay ug ubay-ubay ang nangaangol.

Samtang kagahapong adlawa, nabiktima usab sa pagpamomba ang dakbayan sa Iligan ug ang Kauswagan sa Lanao del Norte, diin pipila usab ang nangasamdan.

Ang labing bangis nga pagpamomba nahitabo kagahapon sa buntag sa Jolo, Sulu, diin unom ang namatay ug labing minos 40 ang nangaangol.

Kini nahitabo gawas sa simbahan sa Mount Carmel Church sa Jolo, susama sa pagpamomba didto sa Cotabato nga niulbo atbang sa Immaculate Concepcion Cathedral. Subay niini gipahimangnoan ni Rama ang mga Sugbuanon nga magmabinantayon aron dili mahitabo dinhi sa Sugbu ang susamang insidente. – Elly Bolonos (BANAT NEWS)