Jagmoc mihimakak sa report

CEBU, Philippines - Mitingog na ang konsehal sa siyudad sa Sugbu nga maoy giingong sentro sa huhungihong nga nakigrelasyon sa usa ka sakop sa Mayor’s Management Team (MMT).

Ang pamilyadong si Konsehal Edwin Jagmoc wala na makaantos nga magpabiling sumsuman ang tsismis nga siya nakiglambigit og laing babaye.

Kusganong gihimakak sa konsehal nga duna siya’y laing linalang nga gimahal gawas sa iyang pinalanggang asawang si Gina. Sa samang higayon, gihimakak usab ni Jagmoc ang taho nga siya gilabay og balde ni Gina dihang ang dalaga nga sakop sa MMT gikomprontase niini.

Giangkon hinuon ni Jagmoc nga sa sinugdanan, nagselos ang iyang asawa sa sakop sa MMT tungod sa ilang panagsuod, apan kini giingong nahilot ra ug gani nagkahigalaay pa ang duha.

“Suod man gud kaayo mi anang babayhana kay kauban man mi sa environment, unya sa among pagkasuod, of course, nagsusisusi akong asawa nag-estorya mi bahin ana, para mawagtang na ang issue ako gyud nga gikuyogan akong asawa ngadto sa boarding house sa babaye sa Urgello unya nagka-estorya sila, amiga na sila karon,” sumala ni Jagmoc.

Gani miingon ang konsehal nga dunay mga higayon nga magkauban silang tulo sa iyang asawa ug sa kontrobersyal nga sakop sa MMT nga manuroy ug mangaon.

Ang pamahayag ni Jagmoc gidasunan sa iyang asawa nga niingong nawagtang na ang iyang pagduda ngadto sa iyang bana ug sa maong dalaga.

 Gipadayag ni Gina nga walay kamatuuran ang tanang

nanggawas nga taho labot sa pagpakigrelasyon sa iyang bana ngadto sa laing kawani sa City Hall.

“Dili gyud na tinuod, amo na nang na-estoryahan gani sige na mi og gawas-gawas, mangaon pa ming tulo sa gawas mao nga nahibulong gyud ko nganong nigawas na nga issue, nagtoo ko nga naa gyo’y nagpadako ana,” sumala ni Gina.

Nasayran nga si Konsehal Jagmoc taud-taud na usab nga nag-alagad sa usa sa mga simbahan sa dakbayan isip lay minister sa Redemptorist Church.

Ang magtiayong Edwin ug Gina nagminyo kapin sa 20 ka tuig na ang nakalabay ug duna nay unom ka mga anak, upat ka babaye ug duha ka mga lalaki.

Gipadayag sa konsehal nga ang migawas nga tsismis wala makaapekto sa ilang kaminyuon ug nakapalig-on pa hinuon kini.

Ang magtiayon nagplano nga mopatawag og usa ka press conference sulod niining semanaha aron sa makausa pa ihimakak ang nigawas nga taho.

Wala hinuon matino kung moatubang ba usab sa mga tigbalita ang maong sakop sa MMT. - Elly Bolonos (BANAT NEWS)