Hayden-Katrina sex videos gisakmit

CEBU, Philippines – Kontrobersyal nga sex video nila ni Dr. Hayden Kho ug Katrina Halili miabot na dinhi sa Sugbu, ang kapolisan milusad dayon og operasyon apan pipila ra ka kopya ang nasakmit, apan sa tugpahanan sa Mactan-Cebu International Airport kinahong gidudahang mga susamang videos ang gisakmit usab sa Customs Police kagahapon.

Duha ka stalls ang nakuhaan sa maong sex video scandal sa mga sakop sa City Intelligence Branch kagahapon sa alas 3:00 pasado sa hapon diha sa Old Vision Theater sa dalan Colon ning dakbayan.

Ang mga sakop sa CIB nga mironda pinanguluhan ni Sr. Inspector Aileen Recla giingong nakadawat og reklamo diha sa ilang buhatan labot sa maong sex scandal video nga gisugdan na og baligya.

Sa pag-abot sa kapolisan 33 ra ka mga kopya sa DVD sa sex scandal ni Kho ug Halili ang nakuha nga giingong gibaligya og tag P90 matag kopya.

Giapil usab sa pagsakmit ang uban pang mga pornographic DVDs nga duna gihapoy mga sex scandal videos sa nagkalain-laing mga artista, mga foreign pornographic videos ug uban pa.

Gibana-banang mokantidad og P20 mil ang nasakmit nga mga pornographic materials sumala pa ni Sr. Insp. Recla.

Namatikdan nga dili susama sa ubang mga baligyang pornographic videos, ang Katrina-Hayden sex scandal video wala ibalandra sa mga estante, giingong kinahanglang ipangutana pa sa mamalitay kun duna silay kopya niini una pa kini ipagawas.

Ang kapolisan dunay gigamit nga police decoy pagpalit sa maong sex video ug human makompirmar mihamag dayon ang ubang mga polis ug gisakmit ang tanang mga pornographic videos sa sulod.

Usa ka dalagitang nangangkong 15-anyos ang giapil sa pagdakop sa mga polis kinsa maoy napalitan sa maong sex video, midumili kini sa pagtug-an sa pangalan sa iyang agalon gumikan kay wala siya makaila niini kay usa pa siya ka semanang nagtrabaho kanila.

Ang operasyon gikatahong gilusad gumikan usab sa panawagan ni Dr. Rene Joseph Bullecer sa City Anti Indecency Board (CAIB) nga ipa-kumpiskar gyud kini kun moabot na dinhi sa Sugbu lakip na ang uban pang sex videos.

Iyang giklaro nga ilang magukod ang tindera ingon man stall owner sa maong DVD pinaagi lang sa City Ordinance nga pagpamaligya’g pornographic materials nga adunay piyansang P5 mil.

Samtang sa MCIA, nasakmit ang 12 ka kahong DVD ug VCDs sa Enforcement and Security Services sa Customs police diha sa PAL cargo area kagahapon sa buntag.

Nagduda ang mga awtoridad nga kopya kini sa Halili-Kho sex scandal videos nga gipistahan na karon didto sa kauluhan ug sa internet.

Si Capt. George Macarubo, OIC sa ESS mitug-an sa Banat News nga ang maong mga kahon padulong na untang ipagawas sa maong cargo area dihang na-intercept sa grupo ni Capt. Reynaldo Lascota sa intelligence division sa iyang buhatan.

Wala pa hinuon nila ablihi ang maong kinahong DVD ug VCDs nga gipadala sa usa ka Omar Tantua nga taga Maharlika Village, sa Taguig City ug ang mga consignees giilang sila si Vilam Libre, Dino Lumapas ug Bringgo Peris sa Oman Village ning dakbayan sa Sugbu.

Ang maong kinahong DVDs ug VCDs gibana-banang may gibug-atong 217 ka kilo nga giisyuhan dayon og Alert Order ug warrant of seizure and detention ni Sub Port Collector Rene Benavides. Gikatakda kining imbentaryohon karong adlaw’ng Lunes ug kun masutang mga illegal kining kontrabando sakmiton kini pabor sa gobiyerno. - Uban sa report ni Bong Soriano (BANAT NEWS)