District office ni Benhur sa Bogo gilungkab

CEBU, Philippines – Nabiktima sa pagpanglungkab ang buhatan ni Kongresista Benhur Salimbangon sa ika-upat nga distrito sa lalawigan sa Sugbo nga nahimutang sa New Public Market sa Sitio Cantecson, barangay Gairan siyudad sa Bogo niadtong Miyerkules sa alas 3 sa kaadlawon.

Matud ni PO3 Ramonito Canja sa Bogo Police Station sa dihang nahinabi sa Banat News subay sa inisyal nilang imbestigasyon giguba sa wala pa mailhing mga suspek ang iron grill sa bintana sa maong opisina sa luyo nga bahin ug sa dihang natangtang na gisunod nila og guba ang jalousie blade niini ug didto moagi paingon sa sulod.

Sa dihang nakasulod na ang mga suspek giguba niini ang laing jalousie blade paingon sa electronic office ug sa dihang nakasulod na gipugos og abli niini ang lamesa sa usa sa mga staff ni Salimbangon nga si Vivian Dumoran.

Subay sa inisyal nga imbestigasyon sa kapolisan gibana banang mokabat sa P5,716 ang kantidad nga nahanaw gikan sa hunos ni Dumoran wala pay labot niini ang daghang mga sinsilyo sa hunos nga giapil og dala.

Ang kapolisan padayon pang mihimo og imbentaryo sa uban pang mga butang nga posibleng giapil og sakiyo sa wala pa matumbok nga mga suspek.

Hinuon ang maong buhatan usa lang kadto ka satellite office ni Salimbangon sanglit ang buhatan niini ania man mahimutang sa dakbayan sa Sugbo. Gisuwayan unta og kontak sa Banat News si Salimbangon apan walay motubag sa cellphone niini ug nahibaw-an nga atua pa kini sa Manila. - Darrel A. Carumba (BANAT NEWS)