Tresurera sa pasil gitaktak

CEBU, Philippines - Napamatud-an sa Office of the Ombudsman-Visayas nga sad-an sa kasong Gross Neglect of Duty si Kapitan Romeo Ocarol Sr. sa barangay Pasil ug iyang tresurera nga si Ma. Corazon Veloso tungod sa pagkahanaw sa P973,579.32 nga halin sa water refilling station nga gipadagan sa barangay.

Sa desisyon ni Giovanni Tianero, graft investigation and prosecution officer sa Ombudsman-Visayas, napamatud-an nga sad-an ang duha ka opisyal sa barangay Pasil tungod sa pagpamaligya niini og tubig sa publiko nga walay giisyung resibo.

Si Veloso gipahamtangan og dismissal from service, apan tungod sa Aguinaldo doctrine subay sa desisyon sa Korte Suprema sa kasong Aguinaldo vs. Santos, nahimong moot and academic ang kasong administratiba batok ni Ocarol. Sa maong kaso, bisan sad-an ang usa ka opisyal, i-dismiss ang kasong administratiba kun masublian kini sa eleksiyon hinungdan nga si Veloso lamang ang gitaktak sa serbisyo.

Sumala pa sa desisyon nga nalapas ni Veloso ang Government Auditing Code of the Philippines nga nagmando sa mga collecting officer sama sa tresurera sa barangay nga moisyu og resibo kun modawat og bayad gikan sa publiko.

“From the above-cited laws, rules and regulations, it is clear that respondent Ma. Corazon Veloso, being a Barangay Treasurer charged with the custody of barangay funds and the disbursement of barangay expenses, violated established rules and regulations regarding custody and disbursement of barangay funds, per instructions from respondent Romeo Ocarol Sr.,” ang desisyon nga girekomendar ni acting director Samuel Malazarte ug giaprobahan ni Deputy Ombudsman for the Visayas Pelagio Apostol, nagkanayon.

Ang depensa nilang Ocarol ug Veloso nga wala sila masayod sa balaod wala dawata sa Ombudsman. Gani, ang desisyon nagkanayon nga mipasar og resolusyon ang konseho sa barangay Pasil pagpatuman sa proper accounting procedures paghupot sa tanang pundo sa maong barangay.

Sa maong desisyon, gimandoan sa Ombudsman ang regional director sa Department of Interior and Local Government sa rehiyon sa pag-implementar sa dismissal ni Veloso. Gipadad-an usab og kopya sa desisyon ang Civil Service Commission.

Ang kaso nagsumikad sa anonymous complaint nga nadawat sa Ombudsman-Visayas niadtong Marso 20, 2003 nga gisundan sa pormal nga reklamo gikan nilang kanhi mga Kagawad Mario Bitang ug Ranulfo Abejo.

Ang water refilling station gikan sa pundo ni kanhi Kongresista Nancy Cuenco ug gi-award sa barangay Pasil niadtong 1999.

Sa imbestigasyon nga gihimo sa Ombudsman, ang sekretarya sa barangay Pasil nga si Jeana Gonzales miangkon nga wala silay giisyung resibo sa matag tubig nga mapalit gikan sa barangay water refilling station. – BANAT NEWS