Misis, kabit gipapriso

CEBU, Philippines - Gidakop ug gipapriso sa bana ang iyang kaugalingong asawa apil na ang lalaking gikapuyo niining giingong kabit diha sa barangay Balisong lungsod sa Argao niadtong Domingo sa alas 9:00 sa gabii.

    Ang gidakop sa mga polis mao si Elinita apelyido gipugngan, 39, ug molupyo   sa barangay Balisong nga miipon na kang Sopronio apelyido gipugngan, 39, minyo ug molupyo sa nahisgutang lugar.

Matud pa ni PO1 Renato Nacaytona sa Argao police dihang nahinabi sa Banat News ang bana nga si Ashpo, 48, kasado sa babaye ug taga barangay Talaga maoy mipadakop sa duha.

Ang bana mitug-an nga dugay nang milayas sa ilang balay ang asawa nga nananghid nga manarbaho isip katabang tungod sa kalisud.

Dugang pamahayag sa bana nga mao nalay iyang nahibaw-an nga nakig-ipon na diay kini sa maong lalaki nga daan na niyang nadungog nga giingong kabit sa iyang asawa, sa unang pagkasayod niini wala lang niya kini panumbalinga.

Apan niadtong Domingo lang niya napamatud-an ang maong tabitabi hinungdan nga misumbong dayon siya sa kapolisan.

Si Insp. Teodolo Manatad ug mga sakop misusi sa panimalay ni Sopronio ug ilang naaktuhan nga diha gyud ang duha sa panimalay hinungdan nga ila kining giimbitar sa ilang buhatan.

Matud pa ni PO1 Nacaytona pasakaan na unta nila og kaso kagahapong adlawa ang duha apan gibakwi sa bana ang baruganan niini ug nakahukom nga pasayluon ang asawa alang ug tungod sa ilang duha ka mga anak. (BANAT NEWS)