Sistema sa tubig sa Daanbantayan gisupak

CEBU, Philippines - Gisupak sa pipila ka molupyo sa lungsod sa Daanbantayan ang katukoran sa Daanbantayan Water District (DWD).

Ang mga opisyal sa Tapilon Rural Waterworks and Sanitation Association (TARWASA) nga gipangulohan ni Leandro Ducante maoy misupak niini.

Gani si Ducante mipatawag og usa ka general assembly niadtong Marso 21, 2009 alang sa pagpili og bag-ong mga sakop sa board of directors sa TARWASA kay wala sila'y gusto sa gitukod nga DWD.

Ang maong asembliya gitumong usab sa pagkonsulta kun magpabilin ba silang TARWASA o magpasakop sa DWD nga bag-ohay lang gitukod ubos sa pagsuperbisar sa Local Water Utilities Administration.

Nasayran nga si Ducante sa sayo pa maayo nang nakigsabot kang Bise-Mayor Maria Luisa Loot sa katukoran sa DWD ug mihangyo nga himoon siyang miyembro sa board of directors niini.

Apan gidimalas si Ducante kay wala mapiling opisyal sa DWD hinungdan nga mikisikisi kini ug mibabag na hinuon sa katukoran sa DWD.

Maoy hinungdan nga imbis mawagtang, labi na hinuong gipalig-on sa grupo nila ni Ducante ang TARWASA pinaagi sa pagpili og mga bag-ong opisyal niini atol sa ilang asembliya.

Apan matud pa ni Loot nga gilingla lang sa mga opisyal sa TARWASA ang ilang mga sakop atol sa maong tigum kay mas kinahanglanon kaayo ang DWD kay sa TARWASA.

Giklaro ni Loot nga angayan na nga adunay water district ang Daanbantayan isip first class municipality aron maserbisyohan ang tanang barangay lakip na kadtong wala pa’y water system nga ilang kaugalingon hangtud karon. - BANAT NEWS