Alegasyon vs. Kapitan gihimakak

CEBU, Philippines - Wala panumbalinga sa barangay kapitan sa Canjulao sa dakbayan sa Lapulapu nga si Rufo Bering ang pagpa -recall sa iyang mga kagawad ug hugtanong mihimakak sa mga alegasyon batok kaniya kalabot sa iyang “Abag Silingan Project” sa barangay.

Matud pa ni Bering nga matag quarter sa milabay’ng tuig kanunay siyang mohatag og kwentada sa koleksiyon ug nagasto sa kahugpungan ug gani sa milabay’ng Enero 27 ning tuiga atol sa ilang unang anibersaryo sa Abag iyang gipakita ang sumada niini.

Giklaro usab ni Bering nga dunay 1,240 ka mga miyembro ang Abag Silingan ug 926 niini ang 18-anyos pataas ang pangidaron samtang 324 ang 17-anyos paubos.

Matud pa niya way kamatuoran ang alegasyon sa iyang kagawad nga si Magdalena Perodes nga 5 mil ang sakop niini.

Mao kini hinungdan nganong di makumpleto ang gisaad nga hinabang sa mga namatyan nga P21,500 gikan sa Abag Silingan apan bisan paman niini iyahang gipaningkamutang mahatag kining tanan bisan sa hinayhinay nga paagi.

Samtang kabahin sa isyu sa recall election nga ipasaka sa unom ka kagawad si Bering mikatawa lang niini ug mipadayag nga katungod kini sa maong mga opisyal apan daan na niyang napangandaman ang maong sitwasyon tungod kay kini may bulok politika.

Di usab motuo si Bering nga makakuha og 25 porsiyentong pirma gikan sa 5,100 total voting population sa maong barangay ang buot mopa-recall kaniya nga rekisitor sa Commission on Elections pagpa-recall sa usa ka opisyal.

Matud pa ni Bering ang ‘rally’ nga nahitabo sa milabay’ng Domingo gihulagway niyang usa lamang ka panimalos ni Lapulapu City Mayor Arturo Radaza ug sa mga kaalyado niini gumikan sa pipila ka mga issue nga iyang gihisgutan sa kahanginan sa iyang tulomanon sa radyo batok sa administrasyong Radaza.

Samtang si Lapulapu City ABC president Leo Mercado mipadayag nga wala silay mahimo sa himoong lakang sa mga kagawad sa Canjulao kun ilang ipadayon ang pagpa-recall ni Bering.

Giangkon usab ni Mercado nga ang rally usa sa paagi sa pagsuta kung ang mga tawo sa Canjulao mitoo ba sa mga atake ni Bering batok ni Mayor Radaza ug sa mga kaalyado niini. - Bong Soriano (BANAT NEWS)