Karnaper nadakpan sa Provincial Investigation Branch

CEBU, Philippines - Usa ka carnapper NGA nagpailang sakop sa Kuratong Baleleng Gang sa Mindanao   nadakpan sa mga sakop sa Provincial Investigation Branch (PIB) niadtong Miyerkules sa ala 1:30 sa hapon diha sa may barangay Pardo ning dakbayan sa Sugbo.

Ang gidakop giila sa kapolisan nga si Joey Tablante, 42, taga Matina Davao del Sur apan lumad nga taga Sudlon barangay Lahug ning dakbayan sa Sugbu human giingong mikarnap sa pula nga Toyota nga YBM 470 nga gipanag-iya sa batan-ong negosyanteng si Jason Go, taga Consolacion.

Si Go nangayo’g pakitabang sa PIB human gi-karnap ni Tablate ang iyang gibaligyang sakyanan sa dihang nagkita sila niadtong Lunes sa usa ka car shop diha sa dalan   Jakosalem aron paliton unta kini sa kantidad nga P440 mil.

Si Chief Insp. Elma delos Santos, hepe sa PIB nga gikahinabi sa mga tigbalita nagkanayon nga gi-publish sa classified ads sa maong negosyante sa pamantalaan ang iyang awto.

Apan niadtong Domingo gitawgan siya ni Tablate nga iya kining paliton ug magkita lang sila sa shop diha sa may Jakosalem hinungdan nga ang negosyanteng si Go misanong niini.

Sa dihang nagkakita si Go ug Tablate nagpakaaron ingnon kining motan-aw sa makina gibilin niini ang iyang bag nga brown nga adunay boodle money ug gipakuptan sa tag-iya ug gimaneho ang sakyanan aron isulod sa shop.

Apan sa dihang gipa-atras ni Tablate ang sakyanan kalit lang kining mipaturatoy sa pagpadagan ug wala na gyud kini mobalik pa hinungdan nga gi-report sa Highway Patrol Group (HPG).

Apan nianang Miyerkules sa buntag usa sa ilang asset ang mipahibalo nga adunay awtong ibaligya didto sa dakbayan sa Talisay nga barato lang kaayo nga mokantidad sa P100.

Kasong carnapping ang ilang gipasaka kagahapong adlawa batok kang Tablate samtang nasuta usab nga aduna kini daghang kaso diha sa National Bureau of Investitation ug Theft and Robbery Section , ingon warrant of Arrest sa kasong carnapping sa sala ni Regional Trial Court Judge Douglas Marigomen.

Dugang pa niini nga daghan na usab og si Tablate apan mahadlok nga mopadayon sa kaso ang mabiktima gumikan kay manghulga kining sakop sa Kuratong Baleleng Gang sa Mindanao. (BANAT NEWS)