SOCO dugay 'abot

CEBU, Philippines – Nag-atubang og imbestigasyon ang team sa Scene of the Crime Operation-7 nga nag-duty sugod sa milabay'ng adlaw'ng Domingo hangtud kagahapong adlawa tungod sa kapakyas pagresponde sa usa ka alarma sa tulis diha sa General Maxilum Avenue.

Gimandoang patubagon sulod sa 24 ka oras ang maong team gumikan kay giingong kaadlawon pa kini gitawgan sa telepono apan walay bisan usa nga mitubag sa ilang buhatan ug niana nang pagka-alas 7 sa buntag mitungha sa crime scene.

Kini kapin lima ka oras na ang milabay gikan sa pagkahitabo, ang SOCO maoy unit sa PNP nga mokuha og mga physical evidences diha sa crime scene sama sa fingerprints, basiyo sa bala ug uban pa nga gamiton isip ebidensya sa pagpasaka na unya og kaso.

Ang mga sakop sa Cebu City Police Office maoy nanawag sa SOCO-7 tungod sa pagpanulis sa Fooda Savers Mart nga nahimutang sa barangay Camputhaw ning dakbayan.

Si Sr. Supt. Nestor Satur, hepe sa PNP Crime Laboratory diin usab masakop ang SOCO-7 mimando kang Chief Insp. David Alexander Patriana pagpahigayon og imbestigasyon batok sa maong team nga gipanguluhan ni PO3 Jorlick Roma.

Ang grupo gihatagan lang og 24-oras aron makahatag og katin-awan nganong walay bisan usa kanila nga nakatubag sa tawag sa telepono kun duna may mi-duty nianang gabhiuna.

Si Satur nga nahinabi sa mga tigbalita mipadayag sa iyang kasagmuyo sa gihimo sa iyang mga sakop, matud pa niya nga kinahanglang kanunay'ng naa gyud sila dayon pagresponde sa alarma.

Apan base sa mga nangaging alarma ang mga polis sa ubang unit nagbagulbol nga kanunay'ng maulahi pag-abot ang SOCO.

Sumala pa sa mga imbestigador, dako og papel ang makuhang ebidensya sa SOCO diha sa crime scene nga gamiton pagsuporta sa kaso, apan kun kanunay silang uwahi moabot ug maguba na ang crime scene sa ilang pag-abot dunay dakong posibilidad nga makwestyon ang kredibilidad sa mga ebidensyang ilahang makuha. –BANAT NEWS