Rama ipasanta ang 'vandalism'

CEBU, Philippines -  Gihagit karon ni Cebu City Acting Mayor Michael Rama ang mga opisyales sa kabarangayan sa dakbayan lakip na ang tanang station commander sa kapulisan, pagsulbad sa nagpabiling problema sa vandalism o graffiti sa siyudad.

Ang hagit gihimo sa acting mayor human kini maka-obserbar nga daghan gihapon ang mga bungbong ug koral daplin sa kadalanan sa dakbayan nga gipanghugaw-hugawan.

Alang kang Rama nga dili angayang itugyan sa city government ang pagsulbad sa maong problema tungod kay kini anaa sa mga barangay.

“These activities are prevalent within the barangay, so, it will be a challenge that I’m going to direct to all the barangays, a challenge that I’d like also to direct to all station commanders,” sumala sa acting mayor.

Lakip sa giawhag ni Rama sa pagpadayon sa nasugdan niining kalihukan mao si Konsehal Richard Osmeña, ang giila nga anti-graffiti czar sa siyudad.

Kini tungod kay ang konsehal mao ang nangulo sa Cebu City Anti-Graffiti Task Force nga nagpapas sa mga hugaw-hugaw partikular na sa 2009 Sinulog parade route.

Nasayran nga ang mga koral ug bungbong daplin sa kadalanan nga gipangpintalan sa grupo ni Osmeña niadtong buwan sa Enero, gihugaw-hugawan na usab karon.

Butang nga gikadismaya ni Rama nga maoy nagmando kang Osmeña pagtukod sa task force aron malimpyuhan ang parade route atol sa miaging Sinulog.

Subay niini ang acting mayor nagplanong makigtagbo sa mga supplier og aerosol ug ubang tindahan aron kapasidan-an labot sa pagbaligya niini.

Ang nahisgutang spray paint maoy sagad gigamit sa mga batan-on pagpang-spray o paghugaw-hugaw diha daplin sa kadalanan sa nagkadaiyang barangay.

Usa sa mga barangay sa dakbayan nga dunay daghang mga hugaw-hugaw gamit ang aerosol mao ang San Nicolas Proper. Kini base usab sa obserbasyon sa mga bisitang moduaw sa nahisgutang barangay nga mamalit og pasalubong sama sa buwad ug uban pa. - Elly Bolonos (BANAT NEWS)