Namaligya'g gold bar sikop

CEBU, Philippines - Nasikop sa hiniusang puwersa sa kapolisan sa Carbon ug Talisay ang usa ka 59-anyos nga taga Mandaue human kini gipasanginlang apil sa nangilad sa magtiayong taga Ilo-Ilo ug magsuong taga Zamboanga city pinaagi sa pagbaligya kanila og peke nga gold bar.

Ang gitanggong karon sa Carbon Police Station mao si Felix Lahinaw, taga barangay Guizo, dakbayan sa Mandaue, apan ang iyang duha ka kauban nga nailang sila si Pablo Gumenta ug Vilma Magbanua, parehong taga dakbayan sa Bogo padayon pa nga gipangita sa kapolisan.

Ang gold bar gimarkahan pa gyud og Sumatra Maiknot Bank.

Ang magtiayong taga Ilo-Ilo midangop sa higala ni Supt. Henry Biñas, hepe sa Talisay, human sila mailad sa grupo ni Lahinaw.

Sumala pa ni Zenaida (tinuod nga ngalan gipugngan) nga nagkasosyo sila pagpamalit og bulad sa magsuong nailhan sa apelyidong Tajul nga taga Zamboanga city human sa ilang panag-ila upat ka tuig na ang nakalabay. Usa sa magsuong taga Zamboanga city opisyal sa lungsod sa Indaya, Tawi-Tawi.

Dugang pa niya nga usa ka nailhan nila og “Tiyo” nga taga Ilo-Ilo mipaila nila sa grupo ni Lahinaw.

 Si Zenaida miingon nga uban siya sa iyang bana nga mianhi sa Sugbo ug nakigkita sa magsuong Tajul aron hisgutan ang ilang negosyo, ug naapil ang paghisgot sa pagpamalit og gold bar.

Gibutyag sa kapolisan nga niadtong Lunes, ang grupo ni Lahinaw mipakita sa gold bar ug ila kining gitipakan og gamay aron ipa-appraise sa tulo ka ahensiya didto sa siyudad sa Bogo. Nasuta nga tinuod ang tipak sa gold bar.

Ang grupo ni Lahinaw nangayo kanila og P100,000 nga pasiunang bayad sa gold bar, apan ang mga biktima mihatag lamang og P55 mil. Ang magtiayon mitampo og P22 mil ug gipun-an lamang usab kini sa magsuong Tajul.

Apan nahibulong sila nga human gitunol ang bayad, mibiya silang Lahinaw, Gumenta ug Magbanua ug wala na mamalik.

Gitipakan sa mga biktima ang gold bar nga gibilin ngadto kanila aron ipatan-aw, apan nasuta nga peke kini.

Human nakadangop ang magtiayong Ilonggo sa higala ni Supt. Biñas, gitawagan nila ang cellphone number ni Lahinaw nga gitubag usab niya.

Gikumbinser sa magtiayon si Lahinaw nga makigkita kanila sa Traveler’s Inn Pension House aron ihatag ang kulang nga P45 mil.

Nakig-ayuda si Biñas sa kapolisan sa Carbon ug didto na nila kini nasikop sa naasoy’ng pension house.

Gipasakaan na og kasong estafa si Lahinaw, Gumenta ug Magbanua sa Cebu City Prosecutor’s Office. – BANAT NEWS