FTP nga nanguot og lobot tangtangon

Cebu - May kalagmitang mapapha sa trabaho ang mga polis kinsa gisumbong nga nagbinastos pinaagi sa pagpanguot og lobot sa mga babaye nga nanisko ug nanukmag ug mitamparos sa usa ka bana sa usa sa ilang gibinastosang babaye.

Matud pa ni   Police Regional Office (PRO-7) Chief Superintendent Ronald Roderos  nga iya nang gimandoan ang Regional Investigation and Detective Management Division (RIDMD) nga ipa-ubos sa imbestigasyon ang unom ka Field Training Program (FTP) kinsa giingong nagbinastos sa usa ka diskohan sa Mango Square sa Gen. Maxilom Avenue ning dakbayan niadtong Martes sa kaadlawon.

Gihimo ni Roderos kining maong lakang human madawat niya ang report nga giduso sa buhatan sa Cebu City Police Office kalabot sa pangabusong gihimo sa maong mga FTP.

Gitanggong na sila karon sa prisohan sa Fuente Police Station ug sila giila nga si   POI Constancio Mapili, 30, PO1 Jeker Llanes, 30, PO1 Gilbert Mapili, 29; PO1 Jason Tompong, 23; PO1 Bonifacio Undalok, 24; ug POI1 Anthony Binigay, 23.

Gumikan sa pagpanguot og lobot sa maong mga FTP mireklamo ang managti-ayong Wilfredo Bueno, 28, ug asawa niining si Merva Bueno, 23, ug ang ilang mga higala nga nanisko sa Club Juliana sa nahisgutang lugar.

 Apan si PO1 Llanes dihang gibadlong mihiwasa hinuon ug nasuko unya nanukmag ug mitamparos kang Wilfredo.

Miingon si Roderos wala pa gani sila mahimong polis nga tinuod apan nagpakita na sa ilang kaabusador busa angayang lantawon sa maong mga FTP nga temporary lang sila o probationary ug mahimong ipa-dismiss dayon sila sa serbisyo kun mamatud-ang sad-an sa maong pasangil. - BANAT NEWS