2 giluba sa Talisay atol sa Pasko
CEBU - Duha ka kaso sa pagpanunggab ang nahitabo atol sa Pasko sa managlahing lugar sa dakbayan sa Talisay.
Ang unang insidente nahitabo didto sa sitio Poso-an, barangay Lawa-an II, dakbayan sa Talisay diin ang biktima nga si Rolando Aboyme, 19, gidunggab sa usa ka 18 anyos nga nailhang si Jimly Murillo.
Si Aboyme giingong nakig-inom sa iyang mga silingan uban kang Murillo agig pagsaulog sa Pasko, dihang kalit lang kining nakiglalis kang Murillo.
Ang naulahi kinsa naupsan sa pailob uban sa kaisog kay may gitangkil nga kutsilyo, midunggab sa likod nga bahin sa lawas sa biktima.
Gidala sa tambalanan ang biktima samtang si Murillo usab temporaryong gibalhog karon sa Talisay City Detention Cell samtang nagpaabot sa kasong isang-at batok kaniya.
Sa laing bahin, laing lalake usab ang giluba sa wala pa mailhing kriminal didto sa Isla Puwa barangay Dumlog niadtong Huwebes sa kadlawon.
Si Loreto Traya, 40 , nga taga barangay Biasong, Talisay City naglakaw sa karsada dihang gikalitan lang og luba sa kriminal.
Padayon pang gipangita sa kapolisan ang maong krimina. (BANAT NEWS)
- Latest
- Trending
