Wanted nga rapist sikop

CEBU - Usa ka “wanted” nga manlulugos nga dugay nang gipangita sa kapolisan sa Talisay City didto hidakpi sa dalan Magallanes , Cebu City niadtong Huwebes.

Ang suspetsado giila nga si Arnold Mata, 26, minyo, taga Brgy. Jaclupan sa dakbayan sa Talisay, ug usa ka drayber sa jeep nga pasaheroan.

Nasikop ang maong suspetsado diha sa dalan Magallanes samtang nagmaniho kini og public utility jeep (PUJ) dihang giposasan siya ni SPO2 Jerome Abatayo uban sa pagsilbi sa warrant of arrest nga giluwat ni Judge Olegario Sarmiento Jr. sa RTC Branch 24 Cebu City .

Si Mata maoy giingong milampos sa linuog nga paglugos sa manghod sa iyang asawa apan wala kini molampos sa paglugos sa biyuda nga laing igsoon sa iyang asawa.

Kasamtangan siyang gibalhog karon sa Talisay City jail samtang ang kasong pagpanglugos nga dili kapiyansahan maoy iyang giatubang karon sa hukmanan.    (BANAT NEWS)