Madarang naa na sa BID Mandaue

CEBU - Ang bag-ong Alien Control Officer (ACO) sa Bureau of Immigration and Deportation(BID 7) pormal nang milingkod sa iyang katungdan sa rehiyonal nga buhatan niini didto dakbayan sa Mandaue kagahapon sa buntag.

 Si Casimero Madarang III nga maoy Head Supervisor sa ilang sangang buhatan sa Mactan Cebu International Airport (MCIA) maoy gitudlo nga bag-ong ACO sa BID 7 ug maoy mihulip kang Cesar Cloma kinsa maoy kanhing ACO sa maong buhatan.

 Si Madarang mipasabot sa Banat News nga ang paggunit niya sa maong katungdanan mao nay ikatulong higayon sa pagdumala niya sa BID 7 sumala sa nalatid sa iyang plantilla sa maong ahensiya.

 Samtang si Cloma usab mao na ang modumala sa BID sa ilang sangang buhatan sa MCIA isip Head Supervisor sa maong tugpahanan.

Matud pa ni BID Assistant Secretary for the Visayas ug Regional Director Romeo "Butch" Junia nga dili makabalda sa buhatan sa BID ang kanunay nga paghulip sa mamahimong ACO. – BANAT NEWS