Distrito sa bukid ok ni Jing

CEBU - Pabor si Association of Barangay Council President Eugenio Faelnar sa lakang ni Kongresista Antonio Cuenco pagmugna og laing distrito sa siyudad nga naglangkob sa mga bukirang barangay.

Apan mas gusto si Faelnar nga ang ila lang distrito sa south district ni Cuenco maoy buk-on   ug itugyan ngadto kang Kongresista Raul del Mar ang north district.

Matud ni Faelnar nga kaniadto pa siya misugyot niini ngadto kang Cuenco nga himuong usa ka distrito ang ilang mga bukirang barangay.

Nasayran nga gitinguha ni Cuenco nga iapil ang mga bukirang barangay sa amihanang distrito nga molangkob sa giplanohang Central District.

Butang usab nga wala mahiuyoni ni   del Mar tungod kay sama kang Faelnar, gusto usab niini nga unahon pagbuak ni Cuenco ang iyang distrito.

Kuli hinuon nga mahitabo ang gusto nilang del Mar ug Faelnar tungod kay wala makaabot sa gikinahanglang population requirement ang habagatang distrito.

Ang south district sa dakbayan duna lay 430,586 nga populasyon samtang ang usa ka distrito nanginahanglan og labing minos 250 mil ka mga molupyo.

Ang maong hisgutanan maoy usa unya sa tukion sa umaabot nga general assembly sa ABC karong umaabot nga Disyembre 13. – BANAT NEWS