Tom gihinganlan ni Gwen og 'King of lightness'

CEBU - Mibawos ug mihingan sab si Gobernador Gwendolyn Garcia kang Cebu City Mayor Tomas Osmeña nga “king of lightness” kini human nihingan ang mayor kaniya nga “queen of darkness.”

Ang maong pamahayag giluwatan ni Garcia atol sa pagpresentar ni Supt. Erson Digal sa Provincial Police Office sa tulo ka rebel returnees kagahapon.

Matud ni Garcia wala gyud siya makasabot sa mga opisyal sa City Hall ilabi na sa chief executive nga si Osmeña gumikan kay karung panahona dili na unta angay magbinayloay og negatibong mga reaksyon og kinahanglan magtinabangay alang sa kalamboan sa Sugbu.

Apan giklaro sa gobernador bisan tuod ug gihinganlan siya sa mayor og queen of darkness wala siya makapatid og side-walk vendors ingon man pagpapahawa sa mga manindahay diha sa Sto. Niño.

Alang sa gobernador ang iyang pagkapili isip inahan sa lalawigan sa Sugbu   nakahatag og daghang kaayohan ug usa sa hinungdan tingali nga gihinganlan siya og queen of darkness sa mayor sa dakbayan sa Sugbu.

Nipasabot siya nga dunay mga opisyal nga gustong ilhon sa katawhang Sugboanon nga usa ka bayani ilabi na kung makahimo og kaayohan.

Apan alang kaniya ang pagpili sa katawhan kaniya isip gobernador sa lalawigan sa Sugbu giisip nga gasa ngadto sa katawhan dili lang sa tibuok probinsya kundili lakip na ang mga Sugboanon tungod kay dili kini alang sa iyang personal nga katuyoan.

“Laterally and figuratively hayag naman kaayo ang atong kalungsoran dili lang nagbansiwag sa sugang dagitabnon ug dili hayag na pod tan-awon ilang panagway, puyra buyag. Maayo man pod ang dagan sa atong kalungsoran, apan ipadayon lang gihapon na ilang pagtawag nako og queen of darkness, naglibog ko unsay queen of darkness, seguro ang pag-abot nako dinhi sa Sugbu nga nakahatag kita og kaayohan. Unsa man puy akong itawag niya (mayor) king of lightness o prince of lightness,” nagkanayon ang gobernador.

Ang rebel returnees giilang sila si Jovenal Lato, Jonas Bueno ug Martiniano Olivo pulos miangkong miyembro sa NPA. – BANAT NEWS