Pusil gipalusot sa bungbong

CEBU - Gipalusot ra sa usa ka wala mailhing mamumuno sa bungbong ang pusil niini pagpatay sa usa ka shellcraft worker niadtong milabay’ng gabii diha sa Highway 77 sa barangay Talamban ning dakbayan.

Ang suspek daling nakadagan palayo sa dapit padulong sa sikbit nga subdivision duol sa nahitaboan, samtang dead on arrival sa North General Hospital ang biktima niining si Florencio Napoles, 45, residente sa maong dapit.

Sa imbestigasyon sa Homicide Section pinanguluhan ni SPO2 Rogelio Nedamo, ang biktima kauban sa iyang asawang si Alicia ug inahang si Divina diha sa kusina sa panimalay sa iyang pag-umangkong babaye niadtong gabhiuna.

Samtang sila nagpunay og tabi kalit nga nadungog ang duha ka sunod nga buto sa armas ug diha-diha nahagba ang biktima gikan sa gilingkuran niini, sa ilang pagtan-aw nagkadugo na kini hinungdan nga misiyagit og pakitabang si Alicia.

Dali niyang gilili ang bungbong nga kawayan pagtan-aw sa gawas ug mao nalay iyang nakit-an ang usa ka lalaki nga gikatahong mikaratel og dagan palayo ug maoy gituuhan niyang maoy nipusil sa iyang bana.

Matud pa sa kapolisan dako ang ilang pagtuong nakaila ang asawa sa mamumuno sa bana niini apan gumikan sa kahadlok di pa kini makatug-an, gituuhan usab sa kapolisan nga personal nga kaaway kini sa biktima. – BANAT NEWS