Tomboy gilusong-lusong og dunggab sa papa sa uyab

CEBU - Gidunggab-patay ang usa ka tomboy sa amahan sa iyang gikarelasyong babaye human kini wala mauyuni sa suspek diha sa sitio Cansagiring, barangay Baring lungsod sa Carmen niadtong Miyerkules sa alas 8:50 sa gabii.

Ang biktima mao si Marilyn Fernandez, molupyo sa Cogon East sakop sa maong lungsod samtang ang suspek mao si Arosolito Abayon, taga sitio Kawa, Baring, amahan sa dalagang karelasyon sa biktima.

Ang biktima ug anak sa suspek parehong nagtrabaho sa usa ka pabrika og lampshade sa maong lungsod. Matud ni SPO2 Mario Giangan sa Carmen Police dihang nahinabi sa Banat News nakadawat na’g daghang hulga sa kinabuhi gikan sa suspek ang biktima sa milabay'ng mga adlaw kung di niini buwagan ang anak sa suspek.

Imbes nga mopatuo gikatahong gitaban hinuon niini ang dalaga pipila na ka bulan ang nilabay hinungdan nga niadtong miaging gabii atol sa ilang pagpanggawas sa trabaho gihimo sa suspek ang bahad.

Ang biktima kauban sa laing duha ka mga babayeng katrabaho namakyaw og habal-habal aron ilang masakyan sa ilang pagpamauli apan dihang migawas na kini sa gate kalit siyang gidagan sa suspek nga nagbitbit og kutsilyo dayong hansak sa tuong lusong-lusong hinungdan sa kamatayon niini.

Matud ni SPO2 Giangan pag-abot nila sa nahitabuan nagpadayon pa og sugwak ang dugo gikan sa samad sa biktima ug gidali nila kini og dala sa Danao City District Hospital apan gideklarar kini nga dead on arrival (DOA).

Ang suspek daling nisibat human sa hitabo, dugang nasayran sa kapolisan nga ang babayeng anak sa suspek gikatahong di tinuod nga anak sa naulahi. – BANAT NEWS