15-anyos patay kay gidam-agan og Rough Rider bus

CEBU - Patay dihadiha ang usa ka 15 anyos nga dalagita sa dihang gidasmagan kini sa usa ka bus de pasaheroan ug nalabay 50 metros ang gilay-on ug didto na motugpa sa kanal, samtang naglakaw sa daplin sa karsada paingon nga maghakot og tubig didto sa highway sa Sitio Cabangcalan, barangay Dakit siyudad sa Bogo kagahapon sa alas 7 sa buntag.

Ang biktima nga wala na madala pa sa tambalanan mao si Irish Momongan, 15, tinun-an sa high school apan wala pa matino sa paghimo ning balita kun unsa kining gradoha ug molupyo sa barangay Malingin.

Samtang ang drayber sa Rough Rider bus nga maoy nakadam-ag kaniya nagtangag kini sa plaka nga GVY-314 ug gimaneho sa usa ka Ranel Penas, 30, ulitawo, ug molupyo sa Sta, Rosa, siyudad sa Danao.

Matod ni PO3 Ramonito Canja sa Danao City Police Station sa dihang nahinabi sa Banat News subay sa blotter sa traffic section nga gibasehan niini nga gikan sa Bogo proper ang Rough Rider ug nagsunod kini sa usa ka Ceres Bus ug pulos paingon nga mobiyahe dinhi sa dakbayan sa Sugbo.

Apan paghiabot sa maong lugar mipabulhot ang Rough Rider ug mi-overtake sa gisundan niining Ceres bus apan dihang nakaapas na wala niini mabantayi ang biktima nga naglakaw daplin sa karsada nga nagdala ug balde paingon nga maghakot og tubig.

Nadasmagan gyud ang biktima sa paglugar na sa Rough Rider sa tuong bahin sa bumper niini ug tungod sa kakusog sa impact matud sa mga nakasaksi sa hitabo milupad ang biktima sa gibanabana nga 50 metros ang gilay-on ug didto na motugpa sa kanal.

Gihunongan unta dayon sa drayber ug gidali pagtabang ang biktima sa mga tawo sa maong lugar apan namatay gyud kini dihadiha human maayong pagkabalibali sa lawas niini ingon man nakaangkon usab og dakong kadaot ang ulo niini nga gituohang napantok sa semento.

Ang drayber boluntaryo nga   mitahan sa iyang kaugalingon sa kapolisan ug nagtingkagol na sa paghimo ning balita samtang giandam pa sa kapolisan ang kasong ipasaka batok kaniya. (BANAT NEWS)