Bucao ug Restauro padayon sa panagtigi

CEBU - Asawa ni Konsehal Alan Bucao sa dakbayan sa Talisay nga si Marieta Bucao ang nasagmuyo sa giluwatan nga pamahayag sa asawa ni Konsehal Sergio Restauro nga si Maria Adelaida Restauro kinsa nagkanayon nga “over my dead body” dili siya mokanaog sa barangay hall gawas lang kung aduna nay hukom gikan sa Korte Suprema.

Si Bucao sa pakighinabi niini sa Banat News nagkanayon nga matawag nga usa ka iresponsable ang opisyal nga mosulti sa maong pamahayag ug nasagmuyo siya sa gipanulti ni Restauro.

“Na saddened bitaw ko kay “over my dead body”, unya morag iresponsable man kaayo sa usa ka opisyal nga subject me for confirmation or any rulings from DILG, subject man mi ana, so kung moingon ta og “over my dead body” sa ato pa dili na lang siguro pod ta maminaw kung unsay legal”, ni Bucao pa.

Matud niini nga ang giwara-wara karon sa kampo sa mga Restauro ang dokumento sa “status quo ante” ug sama lang gihapon kini og tagal sa Temporary Restraining Order (TRO) nga sulod sa 60 ka adlaw kini base usab sa nakuha nilang dokumento gikan sa Comelec First Division.

Niadtong Agosto 21, 2008 napupos na ang TRO sa kampo ni Restauro matud ni Bucao ug pwede na siyang molingkod og balik sa pwesto apan naglikay lang siya og samok.

Kahinumduman nga si Restauro nagkanayon nga usa ka “long legal battle” o taas pa nga away sa legalidad ang ilang atubangon ni Bucao.

Apan si Bucao ang mibahad usab nga duna usab silay mga legal nga lakang nga himoon.

Niadtong Martes ang abogado ni Bucao nga si Atty. Delon Urot ang miadto sa kaulohan aron maduso ang ilang motion ngadto sa Comelec alang sa clarificatory kung kinsa na gyud ang molingkod isip kapitan sa barangay San Isidro. – BANAT NEWS